اسلام آباد کی انسداد دہشتگردی عدالت نے جوڈیشل کمپلکس توڑ پھوڑ کیس میں سپرنٹنڈنٹ اڈیالہ جیل سے بانی پی ٹی آئی کے پروڈکشن کے حوالے سے رپورٹ طلب کرلی۔

انسداد دہشتگردی عدالت کے جج طاہر عباس سپرا نے بانی پی ٹی آئی، شاہ محمود قریشی، عمر ایوب، علی نواز اعوان و دیگر رہنماؤں کے خلاف تھانہ سی ٹی ڈی اور تھانہ گولڑہ میں درج دو مقدمات کی سماعت کی۔

عدالت نے سپرینڈینٹ اڈیالہ جیل سے بانی پی ٹی آئی کے پروڈکشن کے حوالے سے رپورٹ طلب کرلی اور کہا کہ بانی پی ٹی آئی اور پرویز الہیٰ سمیت 176 ملزمان کا چالان آگیا ہے۔

سردار مصروف ایڈوکیٹ نے بتایا کہ اسد عمر اس کیس سے ڈسچارج ہوچکے ہیں۔

جج طاہر عباس سپرا نے ریمارکس دیتے ہوئے کہا کہ جو ملزمان غیر حاضر ہیں ان کے بلا ضمانتی وارنٹ جاری کر رہے ہیں، آخری موقع ہے اگر آئندہ سماعت پر حاضری یقینی نہ بنائی گئی تو ضمانتیں خارج کردی جائیں گی۔

بعدازاں انسداد دہشتگردی عدالت نے کیسز کی سماعت 29 جولائی تک ملتوی کردی۔

واضح رہے کہ بانی پی ٹی آئی، شاہ محمود قریشی، عمر ایوب سمیت 200 سے زائد افراد پر  توڑ پھوڑ کے دو مقدمات درج ہیں، پی ٹی آئی ارکان نے 18 مارچ 2023 کو بانی پی ٹی آئی کی پیشی کے موقع پر جوڈیشل کمپلیکس میں توڑ پھوڑ کی تھی۔

توڑ پھوڑ کیسز میں بانی پی ٹی آئی سمیت دیگر قیادت پر ایما کا الزام ہے، کیسز میں علی نواز اعوان، عمر ایوب اور علی امین گنڈا پور عبوری ضمانت پر ہیں۔