اسلام آباد ہائی کورٹ نے توشہ خانہ ٹو میں بانی پی ٹی آئی کی درخواست ضمانت پر اعتراضات دور کردیے اور رجسٹرار آفس کو پیر کو کیس مقرر کرنے کی ہدایت کردی۔

اسلام آباد ہائیکورٹ کے جسٹس میاں گل حسن اورنگزیب نے کیس کی سماعت کی، بانی پی ٹی آئی کی جانب سے عائشہ خالد، شاہینہ شہاب ودیگر عدالت میں پیش ہوئیں۔

عدالت نے وکیل درخواست گزار سے استفسار کیا کہ یہ کیا ہے؟ اور اس پر تو رجسٹرار آفس کے اعتراضات ہیں، جس پر عائشہ خالد ایڈووکیٹ نے کہا کہ یہ بانی پی ٹی آئی کی توشہ خانہ ٹو کیس میں ضمانت کی درخواست ہے۔

جسٹس میاں گل حسن اورنگزیب نے استفسار کیا کہ آپ نے کہا ہے کہ رولز آف consistentsy ہے مگر یہ تو مرد ہے، بشریٰ بی بی تو عورت تھی تو تب ضمانت بنی، کل ہی ایک ایسی درخواست میں نے خارج کردی۔

عدالت نے شاور خاور ایڈوکیٹ سے مکالمہ کیا کہ رجسٹرار آفس کا اعتراض ہے وکالت نامہ جولائی کا ہے اور کاز آف ایکشن نومبر کا ہے، شاہ خاور صاحب اس معاملے پر آپکی معاونت درکار ہے۔

شاہ خاور ایڈووکیٹ نے کہا کہ ایک روٹین پریکٹس ہے، جب درخواست گزار جیل میں ہو تو ہم ایک ساتھ وکالت نامے دستخط کردیے۔

وکیل بانی پی ٹی آئی شاہینہ شہاب نے درخواست پر نوٹسز جاری کرنے کی استدعا کردی، جس پر جسٹس میاں گل حسن اورنگزیب نے ریمارکس دیتے ہوئے کہا قانون فالو ہوگا۔

بعدازاں عدالت نے رجسٹرار آفس کے اعتراضات دور کردیے اور درخواست کو پیر کو مقرر کرنے کی ہدایت دے دی۔