راولپنڈی: پاک فوج کے ریٹائرڈ افسر لیفٹیننٹ کرنل اکبر حسین کا فیلڈ جنرل کورٹ مارشل کیا گیا ہے۔

پاک فوج کے شعبہ تعلقات عامہ (آئی ایس پی آر) کے مطابق پاکستان آرمی کے ریٹائرڈ افسر لیفٹیننٹ کرنل اکبر حسین کو پاکستان آرمی ایکٹ 1952 کے تحت فیلڈ جنرل کورٹ مارشل (ایف جی سی ایم) کے ذریعے ڈیوٹی سے فارغ ہونے والے فوجی اہلکاروں میں بغاوت پر اکسانے کے الزام میں سزا سنائی گئی۔

آئی ایس پی آر نے بتایا ہے کہ ریٹائرڈ کرنل اکبر حسین پر فوجی اہلکاروں کو فرض کی ادائیگی کے دوران بغاوت پر اکسانے کا الزام تھا، تاہم قانونی طور پر مجاز عدالت نے لیفٹیننٹ کرنل اکبر حسین کو لگائے گئے الزامات کا مرتکب قرار دیا۔

ترجمان پاک فوج کا کہنا تھا کہ قانونی عمل کے ذریعے ریٹائرڈ لیفٹیننٹ کرنل اکبر حسین کو 10 مئی 2024 کو 14 سال قید بامشقت سنائی گئی جبکہ ان کا رینک 26 جولائی سے ضبط کرلیا گیا ہے۔

آئی ایس پی آر کے مطابق ماضی میں سابق میجر ریٹائرڈ عادل فاروق راجا اور سابق کیپٹن ریٹائرڈ حیدر رضا مہدی کا بھی کورٹ مارشل کیا گیا تھا، دونوں کو فوجی اہلکاروں کو بغاوت پر اکسانے کے الزام میں سزائیں سنائی گئی تھیں۔

پاک فوج کے ترجمان نے مزید بتایا کہ عادل فاروق راجہ اور حیدر مہدی کو باالترتیب 14 اور 12 سال قید بامشقت اور عہدہ ضبط کرنے کی سزا سنائی گئی تھی جبکہ ان کے رینک 21 نومبر 2023 کو واپس لیے گئے تھے۔