راولپنڈی: اورکزئی میں سیکیورٹی فورسز کے انٹیلی جنس بیسڈ آپریشن کے دوران لیفٹیننٹ کرنل جنید طارق اور میجر طیب راحت سمیت 10 جوان شہید اور 19 دہشتگرد ہلاک ہوگئے ہیں۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 7 اور 8 اکتوبر کی درمیانی شب ضلع اورکزئی میں انٹیلی جنس بیسڈ آپریشن کیا، جس میں بھارتی اسپانسرڈ دہشت گرد تنظیم “فتنہ الخوارج” کے ٹھکانے کو نشانہ بنایا گیا۔

آئی ایس پی آر نے بتایا کہ کارروائی کے دوران شدید فائرنگ کے تبادلے میں 19 بھارتی اسپانسرڈ خارجی دہشت گرد مارے گئے جبکہ آپریشن کے دوران لیفٹیننٹ کرنل جنید طارق، میجر طیب راحت اور 9 بہادر جوان دہشت گردوں سے لڑتے ہوئے جامِ شہادت نوش کر گئے۔

39 سالہ لیفٹیننٹ کرنل جنید طارق اپنی ٹیم کی قیادت کر رہے تھے جبکہ 33 سالہ میجر طیب راحت نے بھی بہادری سے لڑتے ہوئے جان کا نذرانہ پیش کیا۔

شہداء میں نائب صوبیدار اعظم گل (38 سال، خیبر)، نائیک عادل حسین (35 سال، کرم)، نائیک گل امیر (34 سال، ٹانک)، لانس نائیک شیر خان (31 سال، مردان)، لانس نائیک طالش فراز (32 سال، مانسہرہ)، لانس نائیک ارشاد حسین (32 سال، کرم)، سپاہی طفیل خان (28 سال، ملاکنڈ)، سپاہی عاقب علی (23 سال، صوابی) اور سپاہی محمد زاہد (24 سال، ٹانک) شامل ہیں۔

آئی ایس پی آر کے مطابق علاقے میں دہشت گردوں کے مکمل خاتمے کے لیے سینیٹائزیشن آپریشن جاری ہے۔

ترجمان پاک فوج نے کہا ہے کہ پاکستان کی سیکیورٹی فورسز بھارتی اسپانسرڈ دہشت گردی کے مکمل خاتمے کے لیے پرعزم ہیں اور ہمارے بہادر جوانوں کی قربانیاں قومی عزم کو مزید مضبوط کرتی ہیں۔