ایم بی بی ایس اور بی ڈی ایس میں داخلے کے خوہشمند طلبہ و طالبات کے لیے بڑی خوشخبری، سندھ بھر کی میڈیکل جامعات میں داخلوں کے حوالے سے اہم فیصلہ کرلیا گیا۔

تفصیلات کے مطابق لیاقت یونیورسٹی آف ہیلتھ اینڈ سائنسز کے تحت ہونے والے سندھ بھر کے میڈیکل کالجز کے داخلوں میں  اہم پیش رفت ہوئی ہے ۔

سندھ بھر کی سرکاری و نجی جامعات میں ایم بی بی ایس اور بی ڈی ایس پروگرامز کے داخلوں کی درخواستیں ایک بار پھر طلب کرلی  گئی ہیں۔

اس مرتبہ درخواست گزاروں کی اہلیت کا معیار70 فیصد سے کم کرکے 60فیصد کردیا گیا ہے۔

انٹرمیڈیٹ میں 60 فیصد یا اس سے زائد نمبر حاصل کرنے والے اور 15 ستمبر کو منعقدہ داخلہ ٹیسٹ میں 50 سے زائد نمبر حاصل کرنے والے طلبہ و طالبات درخواست دینے کے اہل قرار دیے گئے ہیں۔

تاہم درخواستیں صرف گذشتہ داخلہ ٹیسٹ میں نا اہل رہ جانے والے امیدوار  ہی جمع کرا سکیں گے۔

واضح رہے کہ جامعہ کی جانب اس سے قبل اہلیت کا فارمولا جو جاری کیا گیا تھا اس میں سیکڑوں طلبہ کو نااہل قرار دے دیا گیا تھا۔پہلے اہلیت کا معیار انٹرمیڈیٹ کے 70 فیصد نمبر رکھے گئے تھے۔

جس کے باعث 60 سے 69.9 فیصد انٹرمیڈیٹ میں نمبر حاصل کرنے والے سیکڑوں امیدوار نااہل ہو گئے تھے۔

سندھ بھر کی میڈیکل جامعات کے انٹری ٹیسٹ میں 28 ہزار سے زائد امیدواروں نے حصہ لیا تھا۔

کراچی سے 9 ہزار 628 طلباء،شہید بے نظیر آباد سے 1705، میرپور خاص سے 11 سو  47،حیدرآباد سے 7 ہزار 954،لاڑکانہ سے 3 ہزار 93 اور سکھر سے 4 ہزار 125 طلباء انٹری ٹیسٹ میں شریک ہوئے تھے۔

داخلے کے لیے درخواستیں 20 نومبر سے 25 نومبر تک لی جائیں گی۔

 درخواستیں ڈاؤ یونیورسٹی آف ہیلتھ سائنسز، لیاقت یونیورسٹی آف ہیلتھ سائنسز جامشورو ، شہید محترمہ بے نظیر بھٹو میڈیکل یونیورسٹی لاڑکانہ میں لی جائیں گی۔

ترجمان لیاقت یونیورسٹی جامشورو کا کہنا ہےکہ امیدواروں کو آن لائن اور مینوئل فارم پر کرنا لازمی  ہے۔امیدوار اپنے اضلاع کو مد نظر رکھتے ہوئے آن لائن فارم پر کریں۔