ممبئی کی چکا چوند کردینے والی فلم نگری سے وابستہ بھارت کی معروف ٹی وی اداکارہ سیجل شرما نے گلے میں پھندا ڈال کر اپنی جان دے دی۔

تفصیلات کے مطابق اداکارہ سیجل شرما کی ممبئی کے علاقے میرا روڈ پر واقع ان کی رہائش گاہ سے پھندا لگی لاش ملی تھی۔ اداکارہ کی خود کشی کا سبب تاحال سامنے نہیں آسکا ہے ۔

ممبئی پولیس ذرائع کا کہنا ہے کہ جب پولیس جائے وقوعہ پر پہنچی تو اداکارہ کی لاش پنکھے سے لٹک رہی تھی۔ ان کے کمرے سے ایک تحریر بھی ملی ہے جس کے مطابق انہوں نے خودکشی کی ہے۔

مزید تفصیلات کے مطابق حیرت انگیز طور پر واقعے کے وقت اداکارہ کے دو دوست بھی ان کے گھر میں موجود تھے ۔اداکارہ کی لاش کو پوسٹ مارٹم کے لیے اسپتال منتقل کردیا گیا ہے جب کہ واقعے کی رپورٹ بھی درج کرلی گئی ہے۔

پولیس نے جائے وقوعہ سے ابتدائی شواہد اکٹھے کر لیے ہیں اور جائے وقوعہ پر موجود ان کے دوستوں کے بیانات بھی قلم بند کرلیے ہیں۔ پولیس مذکورہ بالا خط کی بھی جانچ کررہی ہے کہ آیا یہ تحریر اداکارہ کی ہی ہے یا نہیں۔

سیجل شرما کے ساتھی اداکاروں نے خودکشی پر دکھ اور افسوس کا اظہار کرتے ہوئے کہا ہے کہ ہمیں ابھی تک سیجل کی موت کا یقین نہیں ہو رہا، وہ ایک اچھی اداکارہ کے ساتھ اچھی ساتھی تھی لیکن اچانک دوست کے بچھڑنے کی خبر افسوس ناک ہے۔