سال 2017 میں انتقال کر جانے والی ماضی کی مشہور بولی وڈ اداکارہ ریما لاگو عرف نین بھڑبھڑے اکثر فلموں میں ماں کا کردار نبھاتی نظر آئی ہیں۔

انہوں نے زیادہ تر سلمان خان کی والدہ کا کردار ادا کیا۔

ریما نے 25 سے زائد فلموں میں ماں کا کردار ادا کیا، جن میں سے 7 فلموں میں وہ سلمان خان کی ماں بنیں۔

ان کی مشہور فلموں میں “کچھ کچھ ہوتا ہے”، “ساجن” اور “جڑواں” شامل ہیں۔

ریما لاگو بھلے ہی سائیڈ رولز میں نظر آتی ہوں، لیکن ان کی اداکاری اتنی جاندار تھی کہ وہ بعض اوقات مرکزی اداکاروں پر بھی چھا جاتی تھیں۔

یہ کہنا غلط نہ ہوگا کہ ریما کو اداکاری ورثے میں ملی تھی۔

دراصل ان کی والدہ منداکنی مراٹھی سنیما کا بڑا نام تھیں اور اپنی ماں کو دیکھ کر ریما کے ذہن میں بھی اداکارہ بننے کا خیال آیا تھا۔

لیکن آج ہم آپ کو ریما لاگو کی زندگی سے متعلق ایک دلچسپ قصّہ بتانے جارہے ہیں۔

یہ پورا قصّہ فلم “گمراہ” کی شوٹنگ سے جُڑا ہے۔ فلم میں ریما، سری دیوی کی ماں کا کردار ادا کر رہی تھیں۔

تاہم ان کی زبردست اداکاری کو دیکھ کر سری دیوی کو جلن ہونے لگی اور وہ غیر محفوظ محسوس کرنے لگیں، اسی وجہ سے انہوں نے اس فلم سے ریما کے کئی سین کٹوا دیے تھے۔

اس وقت انڈسٹری میں سری دیوی کا راج تھا اور فلموں میں ان کا نام شامل ہونا ایک ہٹ فارمولا سمجھا جاتا تھا۔

یہی وجہ تھی کہ کوئی بھی فلم ساز سری دیوی کو ناراض نہیں دیکھنا چاہتا تھا۔

اسی لیے سری دیوی کے مطالبے پر فلم سے ریما لاگو کے کئی سین ہٹا دیے گئے۔