کوک اسٹوڈیو سیزن 14 میں علی سیٹھی اور شے گل کی جانب سے پیش کیا جانے والا گانا پسوڑی پاکستان سمیت دنیا بھر میں وائرل ہوا۔

علی سیٹھی اور شے گِل کا مشہور گانا پسوڑی کسی تعریف کا محتاج نہیں ہے اور یہ ہی وجہ ہے کہ اسے پوری دنیا میں بہت پسند کیا جا رہا ہے۔

سوشل  میڈیا پر امریکہ سے تعلق رکھنے والی 13 سالہ وائلن بجانے والی کیرولینا کو پاکستانی گانا پسٹوری کی دھن بجاتے ہوئے دیکھا جا سکتا ہے۔

وائرل ہونے والی اس ویڈیو کو  14 ہزار سے زیادہ لوگ دیکھ چکے ہیں۔

گزشتہ دنوں سوشل  میڈیا پر ایک  بھارتی نوجوان کی ویڈیو وائرل ہوئی تھی جسے اپنے کالج کے پروگرام میں پاکستانی گانا پسٹوری کی دھن بجاتے ہوئے دیکھا گیا تھا۔

یاد رہے کہ  پسوڑی نے ایک اور اعزاز اپنے نام کرتے ہوئے اسٹریمنگ ویب سائٹ ’اسپاٹی فائے‘ کے گلوبل وائرل 50 گانوں میں تیسری پوزیشن حاصل کر لی۔

علی سیٹھی نے گلوبل وائرل 50 گانوں کی فہرست کا اسکرین شاٹ شیئر کرتے ہوئے ’پسوڑی‘ کے تیسرے نمبر پر آنے پر خوشی کا اظہار کیا اور ساتھ ہی بتایا کہ انہیں گزشتہ برس زلفی نے بتایا تھا کہ مذکورہ گانا عالمی سطح پر جگہ بنانے میں کامیاب ہو جائے گا۔

علی سیٹھی نے لکھا تھا کہ انہیں زلفی کی بات پر ہنسی آئی تھی اور انہوں نے کچھ کہے بغیر کافی پی کر گانے بنانے پر غور شروع کیا تھا۔

علی سیٹھی نے مزید لکھا کہ اب ان کا ’پسوڑی‘ گلوبل وائرل 50 فہرست میں تیسرے نمبر پر آیا ہے تو انہیں نہ صرف خوشی ہو رہی ہے بلکہ وہ حیران بھی ہو رہے ہیں۔

علی سیٹھی نے اپنی پوسٹ میں شے گِل سمیت زلفی اور عبداللہ صدیقی کو بھی مینشن کرتے ہوئے انہیں مبارک باد پیش کی اور ساتھ ہی تمام شائقین کا خصوصی شکریہ ادا کیا کہ انہوں نے ان کے گانے کو تیسرے نمبر پر پہنچایا۔

واضح رہے کہ پسوڑی کے تیسرے نمبر پر آنے پر علی سیٹھی کے والد نجم سیٹھی نے بھی ٹوئٹ پر بیٹے کو گانے کی عالمی سطح پر کامیابی کی مبارکباد پیش کی تھی۔

 پسوڑی کوک اسٹوڈیو کے تمام سیزنز کا ایسا پہلا گانا ہے جسے 24 گھنٹوں کے دوران 10 لاکھ مرتبہ دیکھا گیا۔