بالی ووڈ فلم انڈسٹری کے مشہور و معروف اداکار نواز الدین صدیقی نے خود سے متعلق تہلکہ خیز انکشاف کردیا ہے۔

حال ہی میں اپنے دیے گئے ایک انٹرویو میں اداکار نواز الدین صدیقی کا کہنا تھا کہ مستقبل میں کبھی اُنہیں اگر فلموں میں کام ملنا بند ہوگیا تو وہ کسی کے پاس کام  مانگنے کے لیے نہیں جائیں گے بلکہ گلیوں اور سڑکوں پر اداکاری کریں گے۔

انہوں نے کہا کہ اگر مستقبل میں مجھے فلموں میں کام ملنا بند ہوا تو مجھ میں اتنی طاقت نہیں کہ میں کسی کے پاس جا کر کام مانگوں۔

ان کا کہنا تھا کہ میں کسی سے یہ نہیں کہہ سکتا کہ مجھے کام دیں بلکہ میں اپنا گھر، اپنے جوتے اور سب کچھ بیچ کر میں اپنی فلم بناؤں گا کیونکہ مجھے خود پر یقین ہے۔

نواز الدین صدیقی نے بتایا کہ اداکاری اہم ہے لیکن اداکاری فلموں میں ہی کی جائے یہ اہم نہیں ہے۔

اداکار نے کہا کہ مجھے اگر فلموں میں کام نہیں ملے گا تو میں گلیوں، سڑکوں، ٹرینوں اور بسوں میں اداکاری کروں گا۔

ان کا کہنا تھا کہ میں نے کبھی یہ بھی نہیں سوچا تھا کہ میں اتنا کامیاب اداکار بنوں گا، میں پہلے ٹیوب لائٹ کی طرح تھا، بولتے ہوئے بھی ہکلاتا تھا۔

انہوں نے مزید کہا کہ کسی بھی چیز کو سمجھنے میں مجھے وقت لگتا تھا، میری شخصیت میں آہستہ آہستہ بہتری آئی ہے۔