پاکستان شوبز انڈسٹری کے مشہور و معروف اداکار علی عباس نے کہا ہے کہ پاکستان میں سوشل میڈیا ایپس کے استعمال کیلئے 18 سال کی حد مقرر ہونی چاہیے۔

حال ہی میں اپنے دیے گئے ایک انٹرویو میں معروف اداکار علی عباس کا کہنا تھا کہ مغربی ممالک میں سوشل میڈیا ایپس کے استعمال کیلئے 18 سال کی حد مقرر ہے تو یقین جانیں کہ گورا بیوقوف نہیں، اس نے کچھ سوچ کر حد مقرر کی ہے۔

انہوں نے کہا کہ دنیا بھر کی طرح پاکستان میں بھی سوشل میڈیا ایپس کے استعمال کیلئے 18 سال کی حد مقرر ہونی چاہیے اور ساتھ ہی اس کی نگرانی کی جائے۔

ان کا کہنا تھا کہ 14 سے 15 سال کی بچیاں کمرے میں بیٹھ کر ویڈیوز بنارہی ہیں تو ہم اندازہ لگاسکتے ہیں وہ بچیاں ذہنی طور پر کس سطح سے گزررہی ہیں۔

علی عباس نے کہا کہ ہمارے ملک میں کھانے کے لالے ہیں، بھکاریوں کی طرح ہم بھیک مانگتے ہیں، ہمارے پاسپورٹ کی ویلیو نہیں، ہر بندہ ہمارا مذاق اڑا رہا ہے اور انہی بچوں کے والدین سے پوچھا جائے کہ وہ بجلی کے بل کیسے ادا کرتے ہیں تو ہمیں ان والدین کی مشکلات کا اندازہ ہو۔

اداکار نے بتایا کہ ہمارے پاس مواد نہیں، نوجوان نسل اپنا راستہ بھول کر منفی ہو رہی ہے جبکہ وہ جو مواد بنا رہے ہیں وہ دیکھنا بھی نامناسب ہے، دنیا بھر میں 75 فیصد ٹک ٹاک مواد لوگوں کو ایجوکیٹ کرتا ہے لیکن ہمارے پاس ایسا مواد نہیں۔