پاکستان شوبز انڈسٹری کی معروف و سینئر اداکارہ بشریٰ انصاری نے کہا ہے کہ خواتین کسی بھی صورت میں شوہر کا تشدد برداشت نہ کریں۔

حال ہی میں معروف و سینئر اداکارہ بشریٰ انصاری نے یوٹیوب پر ایک ویڈیو جاری کی جس میں اُن کا کہنا تھا کہ سب سے زیادہ قصور والدین کا ہوتا ہے جو بچیوں پر تشدد کی بات کو جاننے کے باوجود انہیں تحفظ فراہم کرنے کے لیے آگے نہیں بڑھتے۔

انہوں نے گھریلو تشدد کی شکار شادی شدہ خواتین کو مشورہ دیا ہے کہ وہ شوہر کی جانب سے پہلا تھپڑ پڑنے پر ہی انہیں چھوڑ دیں تو بہتر ہے، ورنہ بار بار وہ تشدد کا نشانہ بنتی رہیں گی۔

ان کا کہنا تھا کہ وہ کسی بھی صورت میں شوہر کا تشدد برداشت نہ کریں اور نہ ہی اپنے شریک حیات کو ذہنی تشدد کی اجازت دیں۔

بشریٰ انصاری نے کہا کہ سب سے زیادہ انہیں سب سے زیادہ غصہ ان والدین پر آتا ہے جو بیٹی پر تشدد ہونے کے بعد یہ کہتے ہیں کہ انہیں پتا تھا کہ ان کی بیٹی پر 6 ماہ یا ایک سال سے تشدد ہو رہا تھا۔

اداکارہ کا کہنا تھا کہ جب والدین پہلے سے ہی جانتے ہیں کہ ان کی بیٹی پر تشدد کیا جا رہا ہے تو وہ انہیں بچانے یا تحفظ فراہم کرنے کے لیے آگے کیوں نہیں بڑھتے اور ان کے قتل کا انتظار کیوں کرتے ہیں؟

انہوں نے کہا کہ شادی شدہ بچیوں کی بھی اسی طرح حفاظت کی جانی چاہیے، جس طرح چھوٹے بچے یا بیٹی کی حفاظت کی جاتی ہے۔

ان کا مزید کہنا تھا کہ جو خواتین شادی کے بعد شوہر کی پہلا تھپڑ پڑنے پر شوہر کو چھوڑ جانے کے قابل ہیں تو وہ فوری طور پر قدم اٹھائیں، کیونکہ بعد میں وہ شخص انہیں دوسری اور تیسری بار بھی تشدد کا نشانہ بنائے گا۔