پاکستان شوبز انڈسٹری کے مشہور و معروف اداکار شہریار منور نے اداکارہ ماہین صدیقی سے شادی کی خبروں پر بالاآخر خاموشی توڑ دی ہے۔

حال ہی میں اپنے دیے گئے ایک انٹرویو میں معروف اداکار شہریار منور نے مبہم انداز میں شادی پر گفتگو کرتے ہوئے نہ صرف شادی کی تصدیق بلکہ یہ بھی بتایا کہ ان کے والدین اور اہلِ خانہ بہت خوش ہیں۔

انہوں نے کہا کہ ان کی نئی زندگی شروع کرنے سے متعلق شوبز شخصیات جانتی ہیں لیکن وہ مذکورہ معاملے پر کوئی بات نہیں کرنا چاہتے۔

ان کا کہنا تھا کہ وہ ہمیشہ سے ہی ذاتی زندگی سے متعلق پرائیویٹ رہے ہیں، وہ ذاتی زندگی اور مسائل کو سامنے لانے سے گریز کرتے ہیں۔

شہریار منور نے نئی زندگی شروع کرنے سے متعلق خوشی کا اظہار کرتے ہوئے کہا کہ وہ بہت خوش ہیں اور وہ خدا کے بھی شکر گزار ہیں جبکہ ان کے اہل خانہ بھی خوش ہیں۔

اداکار نے مداحوں سے اپنے لیے دعاؤں کی بھی اپیل کی، تاہم انہوں نے واضح طور پر کھل کر نہیں بتایا کہ ان کی شادی کب اور کن سے ہو رہی ہے؟ یا پھر ان کی شادی ہوچکی؟

میڈیا رپورٹس کے مطابق شہریار منور دسمبر 2024 تک اداکارہ ماہین صدیقی سے رشتہ ازدواج میں بندھ جائیں گے۔