پاکستان شوبز انڈسٹری کی مشہور و معروف اداکارہ سونیا حسین نے اپنے والد سے متعلق حیران کُن انکشاف کردیا ہے۔

حال ہی میں اپنے دیے گئے ایک انٹرویو میں معروف اداکارہ سونیا حسین نے بتایا کہ بچپن میں والدین کے تعلقات آپس میں اچھے نہیں تھے اس لیے میں والد سے دور اور والدہ کے قریب رہی، اس وجہ سے والد کے ساتھ تعلقات متاثر ہوئے۔

انہوں نے کہا کہ ایک شخص کے ساتھ شادی کے سلسلے میں بات چیت کا سلسلہ شروع ہوا، تو اس نے مجھے احساس دلایا کہ مجھے ماہر نفسیات کی ضرورت ہے۔

ان کا کہنا تھا کہ اُس شخص کے کہنے پر جب ڈاکٹر سے رجوع کیا تو معلوم ہوا کہ بچپن سے جو والد سے دوری کا احساس تھا، اس نے میری شخصیت پر گہرا اثر مرتب کیا ہے، والد ساتھ تو تھے لیکن ایک تشنگی تھی کہ جو تعلق باپ بیٹی کا ہونا چاہیے وہ نہیں تھا۔

سونیا حسین نے بتایا کہ ڈاکٹر کے مشورے پر عمل کرکے پہلے خود کو ٹھیک کیا، پھر ایک دن شمالی علاقہ جات کی سیر پر گئی ہوئی تھی، تو فادرز ڈے تھا اس دن پہلی بار والد کو فون کال کرکے اپنے دل کا حال بیان کیا انہیں ’آی لو یو‘ کہا تو وہ رونے لگ گئے، جس پر احساس ہوا کہ ہمارے درمیان اس سرد رویے کی وجہ سے صرف میں اکیلی متاثر نہیں تھی وہ بھی متاثر تھے۔

اداکارہ کے مطابق اب والد کے ساتھ تعلقات اچھے ہیں، وہ زیادہ باتیں تو نہیں کرتے لیکن اس بات کا احساس دلاتے ہیں کہ انہیں مجھ پر کتنا فخر ہے۔