پاکستان شوبز انڈسٹری کی سابقہ اداکارہ نور بخاری نے کہا ہے کہ انہوں نے تین مردوں سے چار شادیاں کیں۔

حال ہی میں اپنے دیے گئے ایک انٹرویو میں سابقہ اداکارہ نور بخاری کا کہنا تھا کہ حیران کن بات یہ ہے کہ معاشرے میں غیر ازدواجی تعلقات، افیئرز اور معاشقے قابل قبول ہوتے ہیں لیکن ایک سے زائد بار شادیوں کو قبول نہیں کیا جاتا۔

انہوں نے کہا کہ میں نے دیگر گناہوں اور غلطیوں کی بجائے نکاح اور شادیوں کو ترجیح دی، اس لیے ایک سے زائد شادیاں کیں، میں نے تمام شادیوں پسند اور عشق سے کیں لیکن بد قسمتی سے شادیاں نہیں چلیں۔

ان کا کہنا تھا کہ میں نے چار نہیں بلکہ تین مردوں سے چار بار شادی کی جبکہ عون چوہدری سے انہوں نے دوسری بار شادی کی ہے۔

نور بخاری نے کہا کہ مجموعی طور پر ان کی تین شادیاں ہیں لیکن لوگوں نے ان کی پانچ شادیاں بنا دی ہیں اور وہ ان کی دس شادیاں بھی بنا دیں تو انہیں کوئی مسئلہ نہیں ہوگا۔

سابقہ اداکارہ کے مطابق عون چوہدری کے علاوہ انہوں نے دو مردوں سے دو شادیاں کیں جبکہ حالیہ شوہر عون چوہدری سے انہوں نے پہلے بھی شادی کی تھی جو طلاق پر ختم ہوئی اور پھر انہوں نے اسی سے دوبارہ اور مجموعی طور پر چوتھی بار شادی کی۔

انہوں نے کہا کہ عون چوہدری اور ان کے درمیان اختلافات ضرور ہوگئے تھے لیکن دونوں ایک دوسرے کی عزت کرتے تھے اور چونکہ انہی سے بیٹی فاطمہ تھی، اس لیے بھی انہوں نے دوبارہ شادی کی۔

ان کا کہنا تھا کہ میرے تین ہی بچے ہیں اور تینوں کے والد ایک ہی یعنی عون چوہدری ہیں، ان کی بڑی صاحبزادی فاطمہ کی عمر 11 سال، دوسری بیٹی شہر بانو کی عمر 4 سال جبکہ بیٹے محمد علی رضا ایک سال کے ہیں۔

نور بخاری نے مزید کہا کہ اگرچہ وہ نہیں چاہیں گی کہ ان کے شوہر دوسری شادی بھی کریں لیکن چوںکہ مذہب میں مرد کو بیک وقت شادیاں کرنے کی اجازت ہے تو وہ خدا کے حکم کے آگے راضی رہیں گی لیکن دل سے وہ کبھی نہیں چاہیں گی کہ ان کے شوہر دوسری شادی کریں۔