سابق ریسلر و ہالی ووڈ اداکار جان سینا نے کہا ہے کہ بالی ووڈ کنگ شاہ رخ خان بہت ہی ہمدرد اور نرم مزاج انسان ہیں۔

حال ہی میں اپنے دیے گئے ایک انٹرویو میں ہالی ووڈ اداکار جان سینا نے کہا کہ بھارتی بزنس مین مکیش امبانی کے چھوٹے بیٹے اننت امبانی اور رادھیکا مرچنٹ کی شادی کی تقریبات کے دوران شاہ رخ خان سے ہونے والی ملاقات نے اُن کی زندگی بدل دی ہے۔

انہوں نے کہا کہ شاہ رخ خان سے ملاقات کرنے اور ہاتھ ملانے کا موقع ملا جس کا میری زندگی پر گہرا اثر ہوا، یہ ایک بہت ہی جذباتی لمحہ ہوتا ہے۔

ان کا کہنا تھا کہ شاہ رخ خان بہت ہی حیرت انگیز، ہمدرد اور نرم مزاج انسان ہیں، ان سے مل کر میں بالکل حیران اور لاجواب ہوگیا تھا۔

جان سینا نے کہا کہ ملاقات کے دوران شاہ رخ خان سے ہونے والی گفتگو نے میری زندگی بدل دی، ان کے الفاظ میرے لیے بہت متاثر کن تھے اور میری زندگی میں تبدیلی لانے میں مدد گار ثابت ہوئے۔

اداکار کا کہنا تھا کہ اس تبدیلی کے بعد سے میں ان تمام جیک پاٹس کو پہچاننے میں کامیاب رہا ہوں جو مجھے زندگی میں ملے اور میں اس تبدیلی کے لیے شکر گزار ہوں۔

سابق ریسلر و ہالی ووڈ اداکار نے مزید کہا کہ میں اس بات کو یقینی بنانے کے لیے سخت محنت کروں گا کہ میں نے شاہ رخ خان سے جو کچھ سیکھا اسے ضائع نہ کروں۔