پاکستان شوبز انڈسٹری کی معروف اداکارہ مریم نفیس نے کہا ہے کہ بیٹے اور بیٹیوں کے لئے قوانین اور اصول ایک ہونے چاہیے۔

حال ہی میں اپنے دیے گئے ایک انٹرویو میں معروف اداکارہ مریم نفیس کا کہنا تھا کہ ہمارے معاشرے میں جب کسی کے ہاں بیٹے کی پیدائش ہوتی ہے تو وہ خوشی سے ناچتے ہیں اور فخر کرتے ہوئے کہتے ہیں کہ اللہ نے ہمیں بیٹا دیا ہے، پھر وہی بیٹا بڑا ہو کر کُھلے سانڈ کی طرح سڑکوں پر گھومتا ہے اور خواتین کو تنگ کرتا ہے۔

انہوں نے کہا کہ ہمارے معاشرے میں بیٹوں کو ہر چیز کی اجازت ہے، وہ چاہے کچھ بھی غلط کرلیں اُنہیں کوئی پوچھنے والا نہیں جبکہ بیٹیوں پر ہزاروں پابندیاں لگا دی جاتی ہیں۔

ان کا کہنا تھا کہ اگر بیٹی کے لیے مغرب سے پہلے گھر آنا لازمی ہے تو بیٹے کو بھی مغرب سے پہلے گھر بُلایا جائے، جو قوانین اور اصول بیٹیوں کے لیے بنائے گئے ہیں وہی بیٹوں پر بھی لاگو کریں۔

مریم نفیس نے کہا کہ اس معاشرے میں تو بیٹا ساری رات جاگتا ہے، دن کے چار بجے سو کر اُٹھتا ہے اور مغرب کے بعد گھر سے باہر نکل جاتا ہے۔

اداکارہ کا کہنا تھا کہ میں نے یہ نہیں کہا کہ لڑکیوں کو رات کے 8 یا 9 بجے گھر سے باہر نکالیں، میں صرف اتنا کہہ رہی ہوں کہ بیٹوں کو بھی مغرب کے وقت گھر میں بُلائیں، ایسا کرنے سے کم از کم شہر محفوظ تو ہوجائے گا۔

انہوں نے والدین سے سوال کیا کہ آپ بیٹیوں کی تو بہت اچھی تربیت کررہے ہیں لیکن بیٹوں کو کیا سِکھا رہے ہیں؟