پاکستان شوبز انڈسٹری کی معروف میزبان و ماڈل متھیرا نے کہا ہے کہ انہوں نے والد کی وفات تک اُن سے بات نہیں کی۔

حال ہی میں اپنے دیے گئے ایک انٹرویو میں معروف میزبان و ماڈل متھیرا کا کہنا تھا کہ انہوں نے 14 سال کی عمر سے اپنے والد سے بات کرنا بند کی تھی اور ان کے انتقال تک ان سے بات نہیں کی، ان کے والد چند سال قبل فوت ہوگئے تھے۔

انہوں نے کہا کہ جب انہیں والد کی ضرورت تھی تب والد انہیں چھوڑ کر گئے اور ان کی طرف مڑ کر بھی نہیں دیکھا لیکن جب وہ مضبوط بنی، ان کے پاس ہر چیز دستیاب ہوگئی، تب والد نے ان سے رابطہ کرنے کی کوشش کی لیکن تب انہوں نے والد سے رابطہ کرنے کو ترجیح نہیں دی۔

ان کا کہنا تھا کہ جو لوگ مشکل وقت میں ساتھ چھوڑ جائیں، ان کے اچھے وقت میں واپس آنے پر انہیں عزت نہیں دی جانی چاہیے، پھر انہیں بھی بھلا دینا چاہیے۔

متھیرا نے بتایا کہ انہیں والد سے بہت گلے اور شکوے تھے لیکن ان کے انتقال کے بعد انہوں نے والد کو معاف کیا اور تمام شکوے بھلا دیے۔

اپنی شادی سے متعلق گفتگو کرتے ہوئے معروف میزبان نے کہا کہ ان کی طلاق ان کے لیے سب سے بڑا تماشا اور دکھ کی بات تھی، وہ کئی سال تک شوہر کا جسمانی و ذہنی تشدد برداشت کرتی رہیں اور اپنی شادی اور تعلق کو بچانے کی کوشش کرتی رہیں۔

انہوں نے کہا کہ شوہر کے بار بار تشدد کے باوجود وہ ان سے چپکی رہیں اور رشتے کو بچانے کی کوشش کرتی رہیں لیکن آخر میں شوہر ہی انہیں چھوڑ گئے اور کچھ وقت تک وہ صدمے میں چلی گئی تھیں لیکن اب وہ سوچتی ہیں کہ وہ کتنی غلط اور پاگل تھیں کہ تشدد برداشت کرتی رہیں۔

ان کا مزید کہنا تھا کہ ان کے سابق بوائے فریںڈز سے ابھی اچھے دوستانہ تعلقات ہیں لیکن اب ان سے ان کے رومانوی روابط نہیں۔