پاکستان شوبز انڈسٹری کے مشہور و معروف اداکار عمر شہزاد نے کہا ہے کہ والدین کا انتقال دنیا کا وہ واحد لمحہ ہے جس کے لیے انسان خود کو کبھی تیار نہیں کر سکتا۔

حال ہی میں اپنے دیے گئے ایک انٹرویو میں معروف اداکار عمر شہزاد کا کہنا تھا کہ میں اپنی امّی سے جدائی کبھی نہیں بھول سکتا کیونکہ والدین کا کوئی نعم البدل نہیں ہے۔

انہوں نے کہا کہ میں ہر سانس کے ساتھ اپنی والدہ کو یاد کرتا ہوں اب ان کا انتقال ہوئے 9 سال ہوگئے ہیں لیکن جن کے ساتھ انسان نے ہر روز صبح اُٹھنے کے بعد اور پھر رات کو سونے سے پہلے اپنا وقت گزارا ہو اور اپنے دل کی ساری باتیں بتائی ہوں اُنہیں بھلایا نہیں جا سکتا۔

ان کا کہنا تھا کہ والدین کا انتقال دنیا کا وہ واحد لمحہ ہے جس کے لیے انسان خود کو کبھی تیار نہیں کر سکتا حالانکہ وہ یہ بات بھی جانتا ہے کہ زندگی اور موت اللّٰہ کے ہاتھ میں ہے اور یہ برحق ہے سب کی تقدیر میں موت کا وقت مقرر ہے۔

اداکار عمر شہزاد نے کہا کہ جن لوگوں کے والدین حیات ہیں ان سے میں یہ کہوں گا کہ وہ جتنا وقت اپنے ماں باپ کے ساتھ گزار سکتے ہیں گزاریں کیونکہ میں اللّٰہ سے اب وہ ایک لمحہ مانگتا ہوں جو امّی کے ساتھ گزرے اور میں ان کی ساری خواہشات پوری کردوں لیکن اب یہ ممکن نہیں ہے۔