پاکستان شوبز انڈسٹری کی مشہور و معروف اداکارہ صنم سعید نے کہا ہے کہ اداکار کی ذاتی زندگی پر رائے دینے کا کسی کو کوئی حق نہیں ہے۔

حال ہی میں اپنے دیے گئے ایک انٹرویو میں معروف اداکارہ صنم سعید کا کہنا تھا کہ جب آپ اپنی نیت جانتے ہیں، آپ کے ارد گرد کے لوگ آپ کی نیت جانتے ہیں تو آپ باآسانی موٹی چمڑی رکھ سکتے ہیں، آپ با آسانی ناقدین کو نظر انداز کرسکتے ہیں۔

انہوں نے کہا کہ جب آپ کے پاس کوئی سپورٹ سسٹم نہیں ہوگا، اور پھر آپ خود بھی اپنی نیت کو لے کر الجھن کا شکار ہیں تو پھر ناقدین کو نظر انداز کرنا آپ کے لیے مشکل ہوجائے گا۔

ان کا کہنا تھا کہ وہ اپنے کام کولے کر ناقدین کی رائے کو نظر انداز کر دیتی ہیں کیونکہ ان کا ہر کام ہر ایک کے لیے نہیں ہوتا۔

صنم سعید نے کہا کہ جس طرح ہر ایک اداکار سب کو پسند نہیں آسکتا، سب کو خوش نہیں کرسکتا تو اسی طرح دوسروں کا بھی حق ہے کہ وہ کسی کو پسند کریں یا نہ کریں یہ ان کی مرضی ہے لیکن کسی اداکار کی ذاتی زندگی پر اس کا اپنا حق ہوتا ہے، کسی کو اس حوالے سے کسی قسم کی رائے دینے کا کوئی حق نہیں ہے۔

اداکارہ کا کہنا تھا کہ اگر کسی کی ذاتی زندگی پبلک فورم کے سامنے آگئی ہے تب بھی  اس حوالے سے رائے دینے کا کسی کا حق نہیں ہے۔