بالی ووڈ فلم انڈسٹری کے مشہور و معروف اداکار شاہ رخ خان نے کہا ہے کہ ماضی میں مجھے کہا جاتا تھا کہ بدصورتی کی وجہ سے تمہیں منفی کرداروں کی آفر ہوتی ہے۔

بھارتی میڈیا کے مطابق کنگ خان نے ماضی میں یونیورسٹی کے طالب علموں سے تقریر کرتے ہوئے کہا تھا کہ بالی ووڈ میں بہت کم اداکار ایسے ہیں جنہوں نے رومانوی ہیرو سے اپنے کیریئر کا آغاز کیا اور پھر اُنہوں نے جنونی عاشق کے منفی کردار نبھائے لیکن میں نے ایسا کیا کیونکہ مجھے ایسے کردار کرنے کی ضرورت تھی۔

ان کا کہنا تھا کہ میرے بہت اچھے دوست جو اب بالی ووڈ کے ہدایتکار بھی ہیں، اُنہوں نے میرے کیریئر کے آغاز میں مجھے کہا تھا کہ تمہاری شکل بدصورت ہے اور اسی بدصورتی کی وجہ سے تمہیں منفی کرداروں کی آفر ہوتی ہے۔

انہوں نے کہا کہ ہدایتکار نے مجھے کہا تھا کہ تمہارا چہرہ چاکلیٹی ہیرو بننے کے لیے مناسب نہیں ہے، دوست کی بات سُننے کے بعد میں نے بھی بہت ساری چاکلیٹس کھانا شروع کردی تھیں اور پھر خوشی خوشی منفی کرداروں کی آفر قبول کی۔

شاہ رخ خان کا کہنا تھا کہ مداحوں نے جہاں میرے رومانوی کردار پسند کیے تو وہیں مجھے منفی کرداروں میں بھی پسند کیا گیا اور یہی میرے لیے سب سے بڑی کامیابی تھی۔

بالی ووڈ کنگ نے مزید کہا کہ انسان کو بڑے خواب دیکھنے چاہئیں اور اپنے خوابوں کو پورا کرنے کے لیے ہر ممکن کوشش کرنی چاہیے۔