بالی ووڈ فلم انڈسٹری کی مشہور و معروف اداکارہ انوشکا شرما نے کہا ہے کہ ہم کہیں بھی جائیں بچوں اور ہمارے لیے کھانے کے اور سونے کے اوقات مقرر ہیں۔

بھارتی میڈیا رپورٹس کے مطابق انوشکا شرما نے ممبئی میں ایک تقریب سے گفتگو کرتے ہوئے کہا کہ میں نے اور ویرات نے گھر میں ڈسکس کیا کہ اگر ہم اپنی والدہ کے بنائے ہوئے کھانوں کو گھر میں نہیں بنائیں گے تو یہ ریسیپیز ہمارے بچوں تک نہیں پہنچ سکتیں۔

انہوں نے کہا کہ لہٰذا کبھی میں اور کبھی ویرات کھانا پکاتے ہیں، میں کبھی کبھی والدہ کو ریسیپیز جاننے کیلئے کال بھی کرلیتی ہوں۔

ان کا کہنا تھا کہ میرے نزدیک یہ بہت اہم ہے کیوں کہ مجھے لگتا ہے اس طرح ہم اپنے بچوں کو کوئی قیمتی شے منتقل کررہے ہیں۔

انوشکا شرما نے کہا کہ میرے لیے بچوں کی روٹین بہت خاص ہے، ہم عام لوگوں سے زیادہ سفر کرتے ہیں اس دوران ہمارے بچے بھی بہت سی تبدیلیوں کا تجربہ کرتے ہیں لہٰذا ان کے لیے ایک روٹین بنا کر میں انہیں کنٹرول کا احساس دلاتی ہوں۔

اداکارہ کا کہنا تھا کہ ہم کہیں بھی جائیں بچوں اور ہمارے لیے کھانے کے اور سونے کے اوقات مقرر ہیں، یہ روٹین ہمیں خود کو منظم کرنے میں مدد دیتی ہے۔

واضح رہے کہ انوشکا شرما اور ویرات کوہلی نے 2018 میں شادی کی تھی، 2021 میں جوڑے کے ہاں بیٹی وامیکا اور رواں برس بیٹے آکائے کی پیدائش ہوئی ہے۔