پاکستان کی معروف و سینئر اداکارہ ثنا فخر نے کہا ہے کہ انہیں مختلف نمبروں سے دھمکی آمیز کالز آرہی ہیں۔

حال ہی میں معروف و سینئر اداکارہ ثنا فخر نے اپنے جاری کردہ ایک ویڈیو بیان میں کہا کہ ان کا سوشل میڈیا اکاؤنٹ بند کر دیا گیا ہے، انہیں اور ان کے بچوں کو دھمکیاں دی جا رہی ہیں جبکہ ان کی گاڑی کا پیچھا بھی کیا جارہا ہے۔

انہوں نے کہا کہ انہیں سابق شوہر اور سسر کی جانب سے بھی ہراساں کیا گیا۔

ان کا کہنا تھا کہ وہ بہت اذیت میں ہیں اور پریشانی سے دوچار ہیں، وہ کسی غیر قانونی سرگرمی کا حصہ ہیں اور نہ حصہ لینا چاہتی ہیں۔

ثنا فخر نے کہا کہ وہ متعلقہ اداروں کے ذریعے قانونی چارہ جوئی کرنے جارہی ہیں، یہ اوچھے ہتھکنڈے ہیں وہ پیچھے نہیں ہٹیں گی اور مقابلہ کریں گی۔

واضح رہے کہ 2022 میں اداکارہ ثنا نے شادی کے 14 سال بعد شوہر سے علیحدگی اختیار کرلی تھی۔