پاکستان شوبز انڈسٹری کی معروف اداکارہ صبا فیصل کا کہنا ہے کہ لڑکی کو ذہنی پختگی سے قبل شادی کرلینی چاہیے۔

 پاکستان شوبز انڈسٹری کی معروف اداکارہ صبا فیصل نے ایک پوڈ کاسٹ میں کہا کہ ‘شادی صحیح وقت پر کرنی چاہیے، میرے زمانے میں لڑکیوں کی شادی 20 سال کی عمر میں ہوجاتی تھی جو غلط ہے، لڑکیوں کو 25 سال سے پہلے شادی نہیں کرنی چاہیے، شادی کی صحیح عمر 25 سال ہے اور 30 سال کی عمر میں شادی میں بہت دیر ہوجاتی ہے’۔

انہوں نے کہا کہ ‘دیر سے شادی کرنے سے لڑکیاں اپنی روٹین میں ڈھل جاتی ہیں، ربڑ کو بہت دیر تک کھینچیں گے تو اس کا کھنچاؤ ختم ہوجائے گا، انسان پھر کرو یا مرو والی پوزیشن میں آجاتا ہے’۔

صبا فیصل نے کہا کہ ‘لڑکی کے ذہن کی پختگی سے پہلے شادی ہوجانی چاہیے، میں کوئی دقیانوسی بات نہیں کر رہی یہ میرا تجربہ اور خیال ہے ہو سکتا ہے، بہت سے لوگ اس سے اتفاق بھی نہ کریں’۔

اداکارہ نے کہا کہ ‘لڑکیاں جب خود مختار ہوجاتی ہیں تو وہ یہ کہتی ہیں کہ شوہر جو کررہا ہے وہ میں بھی کرسکتی تھی، مجھے اس کے سہارے کی ضرورت نہیں تھی، لڑکی کی خود مختار سوچ بہت غلط ہے اور یہ سوچ تب ہی آتی ہے جب آپ مکمل طور پر میچور ہوچکے ہوتے ہیں، آپ کمانا شروع ہوجاتے ہیں اور پھر آپ ایک پاٹنر دیکھتے ہیں شادی کرلیتے ہیں، شادی چلی چلی ورنہ تو نہ چلی’۔