معروف بھارتی گلوکار و ریپر ہوئے ادتیا پرتیک سنگھ سسوڈیا المعروف بادشاہ نے کہا ہے کہ انہیں اپنی طلاق پر کوئی پچھتاوا نہیں۔

بھارتی میڈیا کے مطابق حال ہی میں اپنے دیے گئے ایک انٹرویو میں گلوکار و ریپر بادشاہ نے بتایا کہ میں نے اپنے رشتے کو بچانے کی پوری کوشش کی تھی۔

انہوں نے کہا کہ مجھے معلوم ہے کہ میں نے اور میری اور سابقہ اہلیہ جیسمین مسیح نے ہر ممکن کوشش کی، ہم نے اپنی بہترین کوشش کی اور وہ سب کچھ کیا جو ہم کر سکتے تھے۔

ان کا کہنا تھا کہ ہم علیحدہ اس لیے ہوئے کیونکہ ساتھ رہنا ہمارے بچے کے لیے صحت مند نہیں تھا۔

بادشاہ نے کہا کہ مجھے اپنے بچے سے ملنے کا موقع ملتا ہے لیکن زیادہ نہیں کیونکہ وہ لوگ لندن میں رہ رہے ہیں۔

گلوکار و ریپر کے مطابق میری بیٹی کے ساتھ میرا تعلق اچھا ہے لیکن وہ میری فین نہیں ہے، وہ بلیک پنک کو سنتی ہے، ایک موسیقار کے لیے اپنے بچے کو دوسرے موسیقار کا مرچنڈائز خرید کر دینا تھوڑا تکلیف دہ ہوتا ہے۔

انہوں نے کہا کہ ان کے اور جیسمین کے درمیان آج بھی دوستانہ تعلقات ہیں، وہ میرے حالیہ کنسرٹ میں بھی آئی تھیں۔

ان کا کہنا تھا کہ جب کسی رشتے میں بچہ شامل ہو تو کیریئر کو پیچھے رکھنا پڑتا ہے اور چیزیں پیچیدہ ہو جاتی ہیں۔

بادشاہ نے مزید کہا کہ وہ ہمیشہ سے بیٹی چاہتے تھے اور ان کی بیٹی کی پیدائش نے ان کی یہ خواہش پوری کی۔