عالمی شہرت یافتہ معروف پاکستانی اداکارہ مہوش حیات نے کہا ہے کہ لازمی نہیں کہ ان کا ہونے والا شوہر بہت زیادہ امیر ہو لیکن اُسکو معاشی طور پر مستحکم ہونا چاہیے۔

حال ہی میں اپنے دیے گئے ایک انٹرویو میں معروف پاکستانی اداکارہ مہوش حیات نے بتایا کہ پہلے وہ شادی سے متعلق سوچتی تک نہیں تھیں لیکن گزشتہ دو سال سے وہ رشتہ ازدواج میں بندھنے سے متعلق سوچ رہی ہیں اور اچھا ساتھی ملنے پر وہ بیاہ جائیں گی۔

انہوں نے کہا کہ ان کے لیے بہت سارے رشتے آتے رہے ہیں، پہلے وہ صاف انکار کر دیتی تھیں اور کہتی تھیں انہیں شادی نہیں کرنی لیکن اب ایسا نہیں۔

ان کا کہنا تھا کہ اب وہ گزشتہ دو ڈھائی سال سے شادی کا سوچ رہی ہیں اور ان کا خیال ہے کہ اگر اچھا جیون ساتھی مل جائے تو شادی بھی کی جا سکتی ہے، یہ اچھا عمل ہے۔

مہوش حیات نے کہا کہ وہ گھریلو خیالات کی خاتون ہیں، ان کے خیال میں شادی صرف دو افراد نہیں بلکہ دو خاندانوں کے درمیان ہوتی ہے اور وہ یہی بات ذہن نشین کر کے زندگی سے متعلق فیصلہ کریں گی۔

اداکارہ کا کہنا تھا کہ وہ ایسے شخص سے شادی کریں گی جو سمجھدار ہو، ذہنی طور پر پختہ ہو اور سب سے اہم بات یہ کہ وہ شوبز کے معاملات کو سمجھتا ہو تاکہ انہیں شادی کے بعد مسائل کا سامنا نہ کرنا پڑے۔

انہوں نے کہا کہ وہ شادی کے بعد بھی شوبز انڈسٹری میں کام کرتی رہیں گی، اس لیے ایسے شخص سے شادی کریں گی جو کہ شوبز کو سمجھتا ہو، بطور اداکارہ ان کے کردار کو وہ سمجھ پائے۔

ان کا کہنا تھا کہ لازمی نہیں کہ ان کا ہونے والا شوہر بہت زیادہ امیر ہو لیکن انہیں معاشی طور پر مستحکم ہونا چاہیے اور ان کے کچھ ناز نخرے اٹھا سکے۔

عالمی شہرت یافتہ معروف پاکستانی اداکارہ مہوش حیات نے مزید کہا کہ چونکہ وہ خود بھی شادی کے بعد کماتی رہیں گی تو پیسہ تو ان کے پاس آجائے گا اور پیسے کو شیئر بھی کر لیں گے لیکن ہونے والے شریک حیات کا سمجھدار ہونا لازمی ہے۔