کوریا کے معروف اداکار سونگ جے رِم کی گھر سے لاش برآمد ہوئی ہے۔

کورین میڈیا کے مطابق 39 سالہ معروف اداکار و ماڈل سونگ جے رم کی لاش 12 نومبر بروز منگل کو ضلع سیونگ ڈونگ میں ان کے اپارٹمنٹ میں پائی گئی اور اس کے ساتھ دو صفحات پر مشتمل خط بھی برآمد ہوا ہے۔

اداکار کی موت کی اصل وجہ معلوم نہیں ہوسکی لیکن پولیس حکام نے تصدیق کی ہے کہ سونگ جے رِم کی موت میں کسی کے ملوث ہونے یا مجرمانہ سرگرمی کے شواہد نہیں ملے، جبکہ مزید تحقیقات جاری ہے۔

کورین میڈیا کی رپورٹس کے مطابق سونگ جے رم کی آخری رسومات 14 نومبر کو یوئڈو میں ادا کی جائیں گی۔

یاد رہے کہ سونگ جے رم نے 2009 میں اداکاری سے اپنے کیریئر کا آغاز کیا تھا اور ’مون ایمبریسنگ دی سن‘ (2012) جیسے تاریخی ڈرامے میں باڈی گارڈ کے کردار اور ’ٹو ویکس‘ (2013) میں ایک بے رحم قاتل کے کردار سے شہرت حاصل کی۔

وہ معروف رئیلیٹی شو ’وی گاٹ میریڈ‘ کے چوتھے سیزن میں کم سو ایون کے ساتھ نظر آئے تھے، جس نے ان کی مقبولیت کو بلندیوں تک پہنچایا اور انہیں 2017 میں ایم بی سی انٹرٹینمنٹ ایوارڈز میں بہترین جوڑی کا ایوارڈ بھی ملا۔