بھارتی اداکار مشتاق خان کو اغوا کیے جانے کا انکشاف ہوا ہے۔

حال ہی میں بھارتی اداکار مشتاق خان کے بزنس پارٹنر شیوم یادیو نے کامیڈین کے 24 گھنٹے تک اغوا کاروں کی تحویل میں رہنے کا انکشاف کیا ہے۔

شیوم یادیو کا کہنا ہے کہ ’مشتاق خان کو میرٹھ میں منعقدہ ایک تقریب میں شرکت کے بہانے اغوا کرلیا گیا تھا، اس تقریب میں شرکت کیلئے مشتاق کو ایڈوانس پیمنٹ اور ٹکٹس تک بھیجے گئے تھے‘۔

انہوں نے کہا کہ ’کامیڈین مشتاق خان جب دہلی پہنچے تو انہیں بذریعہ کار بجنور پہنچایا گیا جہاں پہنچ کر اغواکاروں نے مشتاق کو تشدد کا نشانہ بنایا اور ایک کروڑ بھارتی روپے تاوان طلب کیا‘۔

بزنس پارٹنر نے کہا کہ ’اغوا کار مشتاق کو تقریباً 12 گھنٹے تک تشدد کا نشانہ بناتے رہے، اس دوران انہوں نے ایک کروڑ روپے کے تاوان کا مطالبہ کیا اور بلآخر وہ کامیڈین اور ان کے بیٹے کے اکاؤنٹ سے 2 لاکھ روپے  نکالنے میں کامیاب ہوگئے‘۔

شیوم یادیو نے کہا کہ ’اغوا کیے جانے کے بعد اگلی صبح فجر کی اذان سن کر مشتاق نے محسوس کیا کہ مسجد قریب ہے اور آس پاس کوئی موجود بھی نہیں لہٰذا وہ وہاں سے بھاگ نکلے، ان کا فرار کسی  ہندی فلم کے سین جیسا ہی تھا، مسجد پہنچ کر انہوں نے وہاں کے لوگوں اور پولیس کی مدد لی اور بحفاظت گھر پہنچ گئے‘۔

بزنس پارٹنر کے مطابق مشتاق خان نے اپنے اغوا ہونے سے متعلق ایف آئی آر درج کروادی ہے اور پولیس اغوا کاروں کی تلاش کررہی ہے۔