پاکستان شوبز انڈسٹری کی معروف اداکارہ و ماڈل سائرہ یوسف نے کہا ہے کہ رشتے ختم ہونے کے بعد فوراً نئی زندگی شروع کرنا آسان نہیں ہوتا۔

حال ہی میں اپنے دیے گئے ایک انٹرویو میں معروف اداکارہ و ماڈل سائرہ یوسف نے بتایا کہ آج کے دور میں طلاق کی شرح بڑھنے کی وجہ سے والدین اس حقیقت کو سمجھ چکے ہیں کہ رشتے ختم ہونے کے بعد فوراً نئی زندگی شروع کرنا آسان نہیں ہوتا اور میرے والدین بھی اب یہ بات سمجھ گئے ہیں۔

انہوں نے کہا کہ معاشرے کا یہ دباؤ ہوتا ہے کہ عورت کو اپنی زندگی میں مرد کا سہارا چاہیے، لیکن اب لوگ سنگل ماؤں کو بھی قبول کرنے لگے ہیں۔

ان کا کہنا تھا کہ ہر عورت کو خود مختار ہونا چاہیے کیونکہ ہر کسی کا مضبوط خاندانی پسِ منظر نہیں ہوتا اور یہی مالی خود مختاری مشکل وقت میں ان کے کام آتی ہے۔

سائرہ یوسف نے کہا کہ مالی خود مختار ہونے کی وجہ سے انہوں نے اپنی زندگی میں کئی اہم فیصلے کیے۔

اداکارہ کا کہنا تھا کہ عورتوں کو بچوں کے ساتھ آگے بڑھنا چاہیے نہ کہ انہیں پیچھے چھوڑ دینا چاہیے۔

دورانِ انٹرویو دوسری شادی سے متعلق سوال پر اپنے شریکِ حیات کی خصوصیات پر بات کرتے ہوئے انہوں نے کہا کہ ان کے لیے سب سے اہم بات یہ ہے کہ مرد میں خدا خوف ہو۔

 ان کا کہنا تھا کہ بدتمیزی، محبت میں زبردستی اور جذبات کو قابو کرنے والے رویے ایک مرد میں سب سے بڑی خامیاں ہیں۔

واضح رہے کہ سائرہ یوسف نے 21 اکتوبر 2012 کو اداکار شہروز سبزواری سے شادی کی جبکہ مارچ 2020 میں دونوں میں علیحدگی ہوگئی۔

طلاق کے بعد سائرہ یوسف اپنی بیٹی نورے کی پرورش کررہی ہیں جبکہ شہروز سبزواری نے ماڈل صدف کنول سے دوسری شادی کرلی جس سے اُن کی ایک بیٹی ہے۔