پاکستان شوبز انڈسٹری کی معروف و سینئر اداکارہ سعدیہ امام نے کہا ہے کہ اُن کو اپنی پھوپھیوں سے بہت پیار ملا اور وہ انہی کی وجہ سے شوبز کا حصہ بھی ہیں۔

حال ہی میں اپنے دیے گئے ایک انٹرویو میں معروف و سینئر اداکارہ سعدیہ امام نے بتایا کہ ان کی پانچ پھوپھیاں تھیں اور انہیں اپنے والد کی بہنوں سے بے تحاشہ پیار ملا، انہیں کبھی کسی چیز کی کمی نہیں دی گئی۔

انہوں نے کہا کہ بچپن میں جب وہ چھوٹی تھیں تو چھٹیاں گزارنے اپنی بڑی پھوپھو کے ہاں آزاد کشمیر چلی جاتی تھیں، جہاں ان کا خیال اولاد کی طرح کیا جاتا تھا۔

ان کا کہنا تھا کہ انہیں اپنی پھوپھیوں سے بے حد محبت ملی، ان کی چھوٹی پھوپھو ان کے کپڑے اور فراک تک سیتی تھیں۔

سعدیہ امام نے کہا کہ ان کی پھوپھیاں ان کا اسکول کا ہوم ورک تک کرواتی تھیں اور وہ ان کی وجہ سے ہی شوبز میں موجود ہیں۔

اداکارہ کا کہنا تھا کہ ان کی بڑی پھوپھو اور پھوپھا نہ صرف ان کی تعلیم پر توجہ دیتے تھے بلکہ ان کا تلفظ بھی درست کرواتے تھے اور ان کی وجہ سے ہی وہ شوبز انڈسٹری کا حصہ ہیں۔

انہوں نے کہا کہ ان کے پھوپھا اور بڑی پھوپھو نے ہی ان کے والدین کو انہیں اداکاری کی اجازت دینے کا کہا تھا۔

ان کا کہنا تھا کہ انہوں نے کبھی خالہ اور پھوپھو میں زیادہ فرق نہیں کیا، انہیں اپنی پھوپھیوں سے پیار ملا، وہ انہیں والدین کی طرح سمجھتی تھیں جبکہ وہ انہیں اپنے بچوں کی طرح دیکھتی تھیں۔