پاکستان شوبز انڈسٹری کے معروف و سینئر اداکار ہمایوں سعید نے کہا ہے کہ ہیرو کا تعلق عمر سے نہیں بلکہ کردار سے ہوتا ہے۔

حال ہی میں کراچی آرٹس کونسل کی جانب سے منعقد کی جانے والی سترہویں اردو کانفرنس کے ایک سیشن میں خطاب کرتے ہوئے معروف و سینئر اداکار ہمایوں سعید نے بتایا کہ پاکستان میں ہیرو اور ہیروئن سے متعلق الگ تصورات پائے جاتے ہیں، باقی ممالک اور خصوصی طور پر مغربی ممالک میں ایسا نہیں ہوتا۔

انہوں نے کہا کہ درحقیقت ہیرو اور ہیروئن کا عمر سے کوئی تعلق نہیں ہوتا لیکن ہمارے ہاں یہ خیال کیا جاتا ہے کہ ہیرو وہ ہوتا ہے جس کے ساتھ کم عمر ہیروئن آئے گی۔

ان کا کہنا تھا کہ ہالی ووڈ میں آج بھی 65 سال یا اس سے زائد عمر ہونے کے باوجود ڈینزل واشنگٹن یا کیبن کاسنر بطور ہیرو آتے ہیں، کیونکہ ہیرو کا تعلق عمر سے نہیں بلکہ کردار سے ہوتا ہے۔

ہمایوں سعید نے کہا کہ اسی طرح ہالی ووڈ میں میرل اسٹریپ بھی ہیروئن کے طور پر آتی ہیں یا پھر وہ مرکزی کرداروں میں نظر آتی ہیں، مرکزی کردار کے طور پر کاسٹ کرنے کا فیصلہ ہدایتکار یا پروڈیوسر کرتے ہیں جو پہلے یہ دیکھتے ہیں کہ کون سا اداکار یا اداکارہ ایسی ہے جو کہ ان کی توقعات پر پورا اترے گی۔

اداکار کا مزید کہنا تھا کہ جب انہوں نے کیریئر شروع کیا تب ان کے ساتھ ثانیہ سعید، سعدیہ امام اور نادیہ جمیل مرکزی کرداروں میں آتی تھیں اور آج بھی وہ مرکزی کرداروں میں آ رہی ہیں۔