پاکستان کی معروف اداکارہ صحیفہ جبار کا کہنا ہے کہ صرف ڈراموں پر انحصار کرنا پڑے تو میرا کچن نہیں چل سکتا۔

حال ہی میں پاکستان کی معروف اداکارہ صحیفہ جبار نے ایک یوٹیوب شو میں شرکت کی جس میں انہوں نے کیرئیر کے آغاز سمیت ذاتی زندگی کے موضوعات پر گفتگو کی۔

میزبان کی جانب سے ایک سوال کے جواب میں اداکارہ نے بتایا کہ ’میں ایک پٹھان فیملی سے تعلق رکھتی ہوں لیکن اس کے باوجود ہماری فیملی پڑھائی اور شادی کے حوالے سے کسی زور زبردستی کی قائل نہیں‘۔

انہوں نے کہا کہ ’میں شروع سے ہی پڑھائی میں بالخصوص ریاضی اور اکاؤنٹنگ میں اچھی تھی لیکن شوبز میں آنے کے حوالے سے کبھی  نہیں سوچا تھا، یونیورسٹی لائف کے دوران کزن کے فیشن ہاؤس کیلئے ماڈلنگ کی اور پھر یہ سلسلہ شروع ہوگیا، بعد ازاں شادی سے کچھ دن قبل اداکاری کے لیے آڈیشن کی کال آئی اور سلیکشن ہوگئی‘۔

صحیفہ جبار نے کہا کہ ’ہمارے ڈراموں میں اتنے بھی پیسے نہیں ہیں کہ آپ کا کچن چل سکے، اگر کوئی ڈرامہ ایسا ہے جو  4 سے 6 مہینے تک  شوٹ ہو رہا ہے  تو اس کے چیک بھی اسی دوران آتے ہیں اور  پھر یہ معاوضہ اداکاروں کو قسطوں میں ملتا ہے‘۔

اداکارہ نے کہا کہ ’اگر مجھے صرف ڈراموں پر انحصار کرنا پڑے تو میرا کچن نہیں چل  سکتا، یہ صرف اسی وقت ممکن ہے جب  میں سال بھر میں 4 پراجیکٹ کروں، روزانہ شوٹنگ پر جاؤں سوشل میڈیا سے بھی آمدنی جاری ہو تب تو میرا کچن چل سکتا ہے‘۔