معروف پاکستانی ماڈل، ٹی وی میزبان و آر جے انوشے اشرف نے کہا ہے کہ میں ملکی حالات اور سیاست سے مایوس ہوچکی ہوں۔

حال ہی میں اپنے دیے گئے ایک انٹرویو میں معروف پاکستانی ماڈل، ٹی وی میزبان و آر جے انوشے اشرف نے کہا کہ سیاست بہت خراب چیز ہے، وہاں جاتے ہی اچھا شخص بھی برا ہوجاتا ہے، نہ چاہتے ہوئے بھی وہ ایسی پالیسیز کا حصہ بن جاتا ہے، جو اسے پسند نہیں ہوتیں۔

انہوں نے کہا کہ اچھی بات ہے کہ نوجوان سیاست میں آ رہے ہیں اور نوجوانوں کو مزید سیاست میں آنا چاہیے لیکن افسوس کی بات یہ ہے کہ سیاست میں جاتے ہی ہر شخص غلط پالیسیز اور سسٹم کا حصہ بن جاتا ہے۔

ان کا کہنا تھا کہ ان کی والدہ شہید محترمہ بینظیر بھٹو کی بڑی مداح تھیں، وہ ان کے ہر جلسے اور پروگرام میں جاتی تھیں اور انہیں بھی کسی حد تک بینظیر بھٹو کی سیاست پسند تھی۔

انوشے اشرف نے کہا کہ لیکن اب بہت سارے لوگ مایوس ہوچکے ہیں، انہیں سیاست میں دلچسپی نہیں، اب ان کا جذبہ بھی کم ہونے لگا ہے، وہ بھی ملکی حالات اور سیاست سے مایوس ہوچکی ہیں، جس وجہ سے ان کا حب الوطنی کا جذبہ بھی کم ہوچکا۔

معروف ماڈل کا کہنا تھا کہ اب وہ جذبات میں آکر یہ جوشیلے نعرے نہیں لگاتیں کہ یہ ہمارا ملک، ہم نے اس کی آزادی کی خاطر قربانیاں دیں، ملک میں رہنے والے افراد کی طرح بیرون ملک مقیم پاکستانیوں کا جذبہ حب الوطنی بھی کم ہونے لگا ہے، وہ بھی مایوس ہونے لگے ہیں۔

انہوں نے کہا کہ اب دیار غیور میں رہنے والے پاکستان یہاں پیسے بھیج بھیج کر تنگ آ چکے ہیں جبکہ یہاں کے تمام لوگ مایوس ہوچکے ہیں۔

ان کا مزید کہنا تھا کہ ملک کے تعلیمی ادارے، لائبریریاں، تھیٹرز اور صحت مند بحث و مباحثے والے مقامات ویران ہوچکے ہیں، کہیں اچھی صحت مند بحث نہیں ہوتی۔