پاکستان شوبز انڈسٹری کی معروف اداکارہ بشریٰ انصاری کا کہنا ہے کہ بہت ہی ناشکرے ہیں وہ جو لڑکی کیساتھ جہیز بھی چاہتے ہیں۔

حال ہی میں پاکستان شوبز انڈسٹری کی معروف اداکارہ بشریٰ انصاری نے اپنے یوٹیوب چینل پر ایک وی لاگ شیئر کیا ہے جس میں اُنہوں نے جہیز کی وجہ سے لڑکیوں اور ان کے والدین کو درپیش مشکلات کے بارے میں بات کی ہے۔

انہوں نے کہا کہ جہیز کے معاملے میں ہمارے ملک میں ابھی تک کوئی قانون نہیں بنا ہے، اس سے متعلق قانون بننا چاہیے کیونکہ لوگوں کو بیٹیوں کی شادی کے معاملے میں بہت مشکلات کا سامنا کرنا پڑتا ہے۔

بشریٰ انصاری نے کہا کہ لوگ اپنی بیٹیوں کی اتنی محنت اور محبت سے پرورش کر کے انہیں رخصت کرتے ہیں اور ساتھ میں جہیز کے نام پر ڈھیر سارا سامان بھی دیتے ہیں اور اس کے باوجود بھی ڈرتے ہیں کہ پتہ نہیں سسرال والے ان کی بیٹیوں کو خوش رکھیں گے یا نہیں۔

اداکارہ نے کہا کہ وہ لوگ بہت ہی ناشکرے ہوتے ہیں جو لڑکیوں کے ساتھ جہیز کا سامان بھی چاہتے ہیں، میں نے اپنے رات دن لگا کر اپنی بیٹیوں کو پالا پھر ان کی شادیاں کیں تو اُنہیں جہیز میں سب کچھ دیا یہاں تک کے ایک اپارٹمنٹ بھی دیا۔

انہوں نے کہا کہ لڑکی کے والدین داماد کو اپنا بیٹا سمجھ کر اس کا خیال کرتے ہیں لیکن جب داماد سامنے سے انتہائی ناشکری کا مظاہرہ کرتے ہیں اور اُنہیں یاد بھی نہیں رہتا کہ ان پر کتنی مہربانی کی گئی ہے تو بہت دکھ ہوتا ہے۔