پاکستان کے معروف اداکار فہد مصطفیٰ نے برطانوی پارلیمنٹ کے دونوں ہاؤسز سے اہم اعزاز اپنے نام کر لیا ہے۔

حال ہی میں پاکستان کے معروف اداکار فہد مصطفیٰ نے اپنے انسٹاگرام اکاؤنٹ پر ایک پوسٹ شیئر کی ہے جس میں انہوں نے مداحوں کو اپنی کامیابی سے آگاہ کیا۔ انہوں نے ایواڈز کے ساتھ تصویر اور مختصر ویڈیو بھی شئیر کی۔

 پوسٹ کے کیپشن میں اداکار نے لکھا کہ ہماری کہانیاں واقعی اہم ہیں، یہ کامیابی صرف میری نہیں ہے بلکہ یہ پاکستان کے ہر فنکار، ہر خواب دیکھنے والے اور ہر کہانی کار کی ہے جو بڑے خواب دیکھنے اور حدیں پار کرنے کی ہمت رکھتا ہے۔

انہوں نے لکھا کہ یہ ہماری ثقافت کی طاقت، ہماری کہانیوں اور اتحاد کے غیر متزلزل جذبے کا ثبوت ہے جو ہمیں عالمی سطح پر پہچان دلاتا ہے۔

فہد مصظفیٰ کا کہنا ہے کہ برطانوی پارلیمنٹ میں پاکستان کی نمائندگی کرنے پر فخر و عاجزی محسوس کر رہا ہوں۔

انہوں نے کہا کہ انہیں ہاؤس آف کامنز میں ڈائیورسٹی اینڈ کلچرل امپیکٹ ایوارڈ اور گلوبل کلچرل یونٹی ایوارڈ سے نوازا گیا ہے۔

اداکار نے برطانوی ممبر پارلیمنٹ محترم ناز شاہ، دی رائٹ آنرایبل لارڈ واجد خان اور ملٹی کلچرل یو کے کا تہِ دل سے شکریہ ادا کیا۔

واضح رہے کہ یہ پہلا موقع ہے کہ جب بیک وقت کسی فنکار کو برطانوی پارلیمنٹ کے دونوں ہاؤسز کی جانب سے اعزاز سے نوازا گیا ہے۔