اسپین میں پاکستانیوں کی مہمان نوازی پر پشپا اسٹار سنیل کا اہم بیان سامنے آگیا ہے۔

حال ہی میں حیدرآباد میں فلم ‘پشپا 2: دی رول’ کی کامیابی کا جشن منایا گیا، جس میں ہدایتکار سُکمار، مرکزی اداکار اللو ارجن اور پوری ٹیم نے شرکت کی۔

اس موقع پر اداکار سنیل، جو فلم میں منگلم سینو کا کردار ادا کر رہے ہیں، نے ایک دلچسپ واقعہ بتایا کہ جب وہ اسپین میں موجود تھے اور پاکستانیوں نے ان کو پہچان لیا پھر خوب مہمان نوازی بھی کی۔

سنیل نے بتایا کہ وہ اجیت کمار کی فلم ’گڈ بیڈ اگلی‘ کی شوٹنگ کے لیے اسپین میں موجود تھے۔ ایک دن شوٹنگ کے بعد جب کھانے کی تلاش میں نکلے تو ایک گیس اسٹیشن پر رات 10 بجے کے قریب کچھ اسنیکس خریدے، لیکن بھوک برقرار رہی۔

انہوں نے بتایا کہ وہ اور ان کی ٹیم قریب میں کھلے ریسٹورنٹس ڈھونڈ رہے تھے، تبھی انہیں ایک کباب پوائنٹ نظر آیا، جو بند ہوچکا تھا۔ باہر کھڑے افراد کو دیکھ کر انہیں لگا کہ وہ بھارتی ہیں۔

اسی دوران ایک شخص نے سنیل کو پہچان لیا اور کہا کہ وہ انہیں ’پشپا 2‘ کے انٹرویل سین میں دیکھ چکے ہیں۔ تصدیق کے لیے اس نے اپنے فون پر وہ سین دوبارہ دیکھا۔

اداکار کا کہنا تھا کہ انہیں بعد میں معلوم ہوا کہ وہ لوگ پاکستانی تھے، جنہوں نے ان کے لیے خصوصی طور پر کھانا تیار کیا۔