پاکستان کے مشہور اداکار و میزبان حمزہ علی عباسی نے بھی مردوں کو اسلام میں 4 شادیوں کی اجازت سے متعلق موضوع پر اپنی رائے کا اظہار کیا ہے۔

حال ہی میں حمزہ علی عباسی نے ایک انٹرویو دیا جس کا ایک مختصر سا ویڈیو کلپ سوشل میڈیا پر وائرل ہورہا ہے۔

میزبان کی جانب سے 4 شادیوں کی اجازت سے متعلق پوچھے گئے سوال کا جواب دیتے ہوئے حمزہ علی عباسی نے کہا کہ میں ایک ہی شادی میں خوش ہوں۔

انہوں نے اپنی رائے کا اظہار کرتے ہوئے کہا کہ اسلام میں 4 شادیوں کی اجازت سے متعلق جو قرآن شریف میں آیت آئی ہے وہ جنگِ اُحد کے بعد آئی، اس وقت کے حالات ایسے تھے کہ اللّٰہ نے خواتین کو سہارا دینے کے لیے آیت نازل کی۔

اداکار نے کہا کہ اللّٰہ ہی نے فرمایا ہے کہ اگر 4 شادیاں کرو تو سب میں انصاف کرو اور اگر ان 4 بیگمات میں انصاف نہ کر سکو تو صرف ایک ہی سے شادی کرو۔

حمزہ علی عباسی کا یہ بیان سوشل میڈیا پر وائرل ہونے کے بعد صارفین اداکار کے علم کی خوب تعریفیں کر رہے ہیں۔

دوسری جانب سوشل میڈیا صارفین حال ہی میں اپنی بیگم اداکارہ عائزہ خان کی موجودگی میں 4 شادیوں سے متعلق بیان دینے والے اداکار دانش تمیور پر تنقید کر رہے ہیں۔

شو کے دوران دانش تیمور نے اپنے ایک بیان میں کہا تھا کہ اسلام نے مجھے 4 شادیوں کی اجازت دی ہے، یہ میرا عائزہ خان سے پیار ہے کہ فی الحال میرا دوسری شادی کا کوئی ارادہ نہیں ہے۔