ممبئی: پاک بھارت کشیدگی کے سبب پاکستانی فنکار فواد خان کی نئی فلم مشکل میں پڑگئی۔

بھارتی حکومت پہلگام حملے کی آڑ میں پاکستان ہی نہیں پاکستانی فنکاروں کے خلاف بھی اوچھے ہتھکنڈوں پر اتر آئی، بھارتی حکومت نے فواد خان کی نئی فلم ’’ابیرگلال‘‘ کو ریلیز کی اجازت دینے سے انکار کردیا ہے۔

ریاست مہاراشٹرا میں بھی راج ٹھاکرے کی جانب سے فواد خان کی نئی فلم ’’ابیرگلال‘‘ کو کسی بھی سینما میں چلنے نہ دینے کی دھمکی دی گئی تھی۔

اب مغربی بھارت کی ایک سینما فیڈریشن کی جانب سے گزشتہ روز پاکستانی فنکاروں، گلوکاروں اور تکنیکی عملے کے ساتھ کسی بھی قسم کا تعاون نہ کرنے کا اعلان کیا گیا ہے۔

فواد خان کی نئی فلم ’’ابیرگلال‘‘ لندن میں شوٹ کی گئی جس میں ان کے ساتھ لیزاہیڈن، ردھی ڈوگرا، فریدہ جلال، سونی رازدان اور پرمیت سیٹھی بھی مرکزی کرداروں میں شامل ہیں۔

پلوامہ حملے کے بعد بھی ہندو انتہا پسندوں نے بھارتی سینما مالکان اور بالی وڈ انڈسٹریز کے کرتا دھرتاؤں کو پاکستانی اداکاروں یا پاکستانی تعاون کے ساتھ کوئی بھی فلم نہ بنانے کی دھمکیاں دی تھیں۔

خیال رہے کہ پہلگام حملے کے بعد ہندو انتہا پسند تنظمیں اور بھارتی سرکار خود پاکستانی فنکاروں کے خلاف کھل کر سامنے آچکی ہے.

سب سے بڑی جمہوریت ہونے کی دعویدار ریاست مہمان فنکاروں تک کو برداشت کرنے کے لئے تیار نہیں یہ مجموعی رویہ بھارت کے ایک انتہا پسند ریاست ہونے کی عکاسی کرتا ہے۔