معروف اداکارہ مشی خان نے حال ہی میں ماریہ بی اور ترک سوشل میڈیا انفلوئنسر ترکاں آتا کے تنازعے میں ماریہ بی کی حمایت میں بیان دیا تھا جس کے بعد اب وہ خود شدید تنقید کی زد میں آگئیں۔

سوشل میڈیا صارفین کا کہنا ہے کہ مشی خان کو اس معاملے میں مداخلت نہیں کرنی چاہیے تھی۔

ایک صارف نے تبصرہ کیا ’’ہم آپ سے محبت کرتے ہیں مشی، مگر ادائیگی، ادائیگی ہوتی ہے، ماریہ بی کو ترکاں کو وقت پر ادائیگی کرنی چاہیے تھی‘‘۔

ایک اور صارف نے لکھا ’’یہ آپ کے لیے چار پیسے ہوسکتے ہیں لیکن دوسرے شخص کے لیے یہ بہت اہم ہو سکتے ہیں‘‘۔

مزید صارف نے تبصرہ کیا ’’آپ ماریہ بی کی دوست ہیں اس لیے جانبداری برت رہی ہیں، مگر حقیقت یہ ہے کہ کسی بھی معاہدے کی پاسداری ضروری ہے اور تین مہینے بعد ادائیگی نہ ہونے پر کوئی بھی ناراض ہو سکتا ہے‘‘۔

یاد رہے کہ مشی خان نے اپنے بیان میں ترکاں آتا کو بدتمیزی کا مرتکب قرار دیا تھا اور کہا تھا کہ ادائیگی تو ہو ہی جانی تھی، اس لیے ایسے سخت رویے کی ضرورت نہیں تھی۔ تاہم ان کے اس مؤقف پر لوگوں نے سخت ردعمل دیا ہے اور اسے غیر مناسب قرار دیا ہے۔

پاکستان کی مشہور فیشن ڈیزائنر ماریہ بی اور ترک انفلوئنسر کے درمیان جھگڑا اس وقت شروع ہوا جب ترک انفلوئنسر ترکاں نے ایک ویڈیو بیان میں ماریہ بی پر ایک کاروباری ڈیل کے بعد رقم کی ادائیگی نہ کرنے کا الزام عائد کیا۔

اس ویڈیو کے جواب میں ماریہ بی نے بھی اپنی ردعمل کا اظہار کیا اور دونوں کے درمیان لفظوں کی جنگ چھڑ گئی۔ اس کے بعد دونوں نے اس معاملے کو عدالت میں لے جانے کا فیصلہ کیا اور اب یہ کیس ایک قانونی جنگ بن چکا ہے۔