پہلگام واقعے کے بعد پاکستان کے سپر اسٹار فواد خان کی بالی ووڈ فلم ’’ابیر گلال‘‘ پر پابندی کا مطالبہ کردیا گیا ہے۔

مقبوضہ جموں و کشمیر میں منگل کے روز پیش آنے والے واقعے میں 28 افراد ہلاک ہوگئے تھے جن میں زیادہ تر سیاح شامل تھے۔

اس واقعے کے بعد فواد خان اور بھارتی اداکارہ وانی کپور کی فلم شدید تنقید کی زد میں آگئی اور بھارتیوں نے ایک مرتبہ پھر فالس فلیگ آپریشن کا بہانہ بنا کر پاکستانی فنکاروں پر وار کرنا شروع کردیا۔

فواد خان کی فلم ابیر گلال کا ٹیزر یکم اپریل کو جاری ہوا تھا، تاہم پہلگام واقعے کے بعد سوشل میڈیا پر ان کی فلم کیخلاف بائیکاٹ مہم کا آغاز کیا جاچکا ہے۔

بھارتی فلم اور ٹیلی ویژن ڈائریکٹرز ایسوسی ایشن کے صدر اشوک پنڈت نے فلم کی ریلیز کی سخت مخالفت کرتے ہوئے کہا کہ یہ محض ایک فلم کا مسئلہ نہیں بلکہ قوم کی سلامتی کا سوال ہے۔

انہوں نے کہا کہ ہم بار بار کہہ چکے ہیں کہ پاکستانی فنکاروں کے ساتھ کام نہ کیا جائے، جو لوگ ملک کے خلاف ہتھیار اٹھا رہے ہیں، ان کے فنکاروں سے تعلق رکھنا شرمناک ہے۔

اشوک پنڈت نے کرکٹ میچز اور بیرون ملک شوز میں پاکستانی فنکاروں کی موجودگی پر بھی اعتراض اٹھایا اور کہا کہ اگر ان فلم سازوں کے اپنے خاندان دہشتگردی کا نشانہ بنتے تو وہ کبھی فواد خان کے ساتھ کام نہ کرتے۔

دوسری جانب فیڈریشن آف ویسٹرن انڈیا سنی ایمپلائز (FWICE) کے صدر بی این تیواری نے بھی اعلان کیا کہ وہ ابیر گلال کی بھارت میں ریلیز کی اجازت نہیں دیں گے اور اگر فلم ریلیز ہوئی تو سخت کارروائی کی جاسکتی ہے جبکہ عوام کی جانب سے بھی سخت ردعمل آئے گا۔

واضح رہے کہ پاکستانی معروف اداکار فواد خان کی نئی بالی ووڈ فلم ’ابیر گلال‘ کی ریلیز 9 مئی 2025 کو متوقع ہے۔