پاکستانی اداکار علی سفینہ کی جانب سے میرب علی کے ساتھ پوڈ کاسٹ میں کیے گئے ایک سوال نے سوشل میڈیا پر ہلچل مچادی ہے جب کہ اس پر میرب علی کے منگیتر اور معروف گلوکار عاصم اظہر کا ردعمل بھی سامنے آگیا۔

دوران پوڈ کاسٹ علی سفینہ نے میرب علی سے ایک ایسا سوال کیا جس میں سابقہ تعلقات اور ان کے منگیتر عاصم اظہر کی سابقہ قریبی دوست ہانیہ عامر کا تذکرہ کیا گیا۔

سوال کے دوران علی سفینہ نے مذاق کرتے ہوئے میرب سے پوچھا ’’کیا عاصم کبھی تمہارے لیے گانے گاتے ہیں؟‘‘ اور پھر اس سوال کو مزید بڑھاتے ہوئے انہوں نے پوچھا ’’کیا عاصم نے کبھی ’وے ہانیا وے دل جانیا‘ گایا ہے؟‘‘۔

اس سوال پر میرب علی نے فوراً خوش دلی کے ساتھ جواب دیا کہ ’’عاصم میرے لیے سارے گانے گاتے ہیں‘‘ اور پھر انہوں نے اس معاملے کو نظرانداز کردیا۔

تاہم انہوں نے یہ بھی کہا ’’اگر میری جگہ کوئی اور ہوتا تو وہ اس سوال پر غصے میں آکر ردعمل دیتا لیکن میں ہنس رہی ہوں‘‘۔

عاصم اظہر نے اس سوال پر اپنی رائے ایک انٹرویو کے دوران دی، جہاں ان سے پوچھا گیا کہ وہ کیسے ایسے ذاتی سوالات کو ہینڈل کرتے ہیں جب لوگ ان کی پرائیویٹ زندگی پر بات کرتے ہیں۔

اس پر عاصم اظہر کا کہنا تھا ’’یہ یقیناً غلط ہے، ہر کسی کو اپنی ذاتی زندگی کی پرائیویسی کا حق ہوتا ہے لیکن آج کے دور میں اگر آپ اپنی زندگی سوشل میڈیا پر شیئر کرتے ہیں تو ایسی صورتحال کے لیے تیار رہنا ضروری ہے‘‘۔

انہوں نے مزید کہا کہ بعض اوقات سوالات حد پار کرجاتے ہیں جو مناسب نہیں ہوتے۔ میں اہل بیت کی تعلیمات پر یقین رکھتا ہوں اور ان کی ہدایت کے مطابق کم بولنا آپ کو بہت ساری مشکلات سے بچاتا ہے۔

انہوں نے یہ بھی کہا کہ وہ ان لوگوں سے قریب رہتے ہیں جو ان سے محبت کرتے ہیں اور باقی لوگوں سے دور رہنا پسند کرتے ہیں۔