چنئی: سائوتھ انڈین اداکار پربھاس کی فلم باہو بلی 2 دوبارہ کب ریلیز ہوگی ؟ بھارتی فلم بینوں نے اعلان کرکے مداحوں کے دل جیت لیے۔

دنیا بھر میں مداح گزشتہ 8 سالوں سے اداکار پربھاس اور رانادگگوبتی کی فلم باہوبلی 2 کی دوبارہ ریلیز کا بے صبری سے انتظار کر رہے ہیں۔ اب فلم بینوں نے اعلان کیا ہے کہ وہ اسی سال اکتوبر میں قومی اور بین الاقوامی سطح پر فلم دوبارہ ریلیز کرنے والے ہیں۔

یہ اعلان پروڈیوسر شوبو یارلاگڈا نے اپنے سوشل میڈیا اکائونٹس ایکس کی ٹائم لائن پر کیا اور لکھاکہ ’’اس خاص دن پر،میں آپ سب کو یہ بتاتے ہوئے بہت خوش اور پرجوش ہوں کہ ہم اس سال اکتوبر میں باہو بلی 2 دوبارہ ریلیز کرنے جارہے ہیں، یہ ریلیز مداحوں اور ہم سب کے لئے ایک جشن کی مانند ہوگی‘‘۔

باہو بلی 2 28 اپریل 2017 کو دنیا بھر میں 9 ہزار سے زیادہ اسکرینز پر ریلیز ہوئی ۔250 کروڑ روپے کے شاہانہ بجٹ پر بننے والی اس فلم نے دنیا بھر میں 1800 کروڑ روپے سے زیادہ کا بزنس کیا،یہ فلم اب تک کی سب سے زیادہ کمائی کرنے والی بھارتی فلم بن گئی ہے۔

اسے پہلی ہندوستانی فلم ہونے کا اعزاز بھی حاصل ہے جس نے کمائی کے لحاظ سے ایک ہزار کروڑروپے کا ہندسہ عبور کیا۔ اس فلم نے کئی بھارتی اور بین الاقوامی ایوارڈز بھی جیتے ہیں۔