پاکستانی شوبز انڈسٹری کی معروف اداکارہ نادیہ خان نے پہلگام واقعے پر بھارت کے خلاف اپنے دوٹوک مؤقف میں کہا ہے کہ بھارت کا مقصد پاکستان کو بدنام کرنا ہے۔

نادیہ خان نے پہلگام واقعے سے متعلق اپنے ایک ویڈیو بیان میں کہا ہے کہ یہ بھارت کا ایک اور جھوٹا فالس فلیگ آپریشن ہے، جس کا مقصد پاکستان پر الزام تراشی کر کے دنیا کی توجہ اصل مسائل سے ہٹانا ہے۔

انہوں نے کہا کہ بھارت کی یہ چالیں دراصل پاکستان کے پانی کے حق پر ڈاکہ ڈالنے کی کوشش ہیں، جو سندھ طاس معاہدے کے تحت ہمارا حق ہے۔

اداکارہ کا کہنا تھا کہ کیا آپ نے کبھی غور کیا ہے کہ جب بھی کوئی اہم امریکی یا مغربی وفد بھارت کا دورہ کرتا ہے، تو عین اسی وقت وہاں دہشت گردی کا کوئی نہ کوئی واقعہ پیش آجاتا ہے؟ سمجھوتہ ایکسپریس، ممبئی حملے اور پہلگام جیسے واقعات صرف سیاسی مقاصد کے لیے استعمال کیے گئے، یہ سب بھارت کی سوچی سمجھی حکمت عملی کا حصہ ہیں۔

مزید پڑھیں: عدنان جیلانی اداکارہ نادیہ خان پر برس پڑے!!!

نادیہ خان نے اپنے دوٹوک مؤقف میں کہا کہ نہ تو ہم بےوقوف ہیں، نہ ہی دنیا اب ان چالاکیوں سے ناواقف ہے، پاکستانی قوم بیدار ہو چکی ہے اور ہر سازش کا بھرپور جواب دے گی۔

واضح رہے کہ نادیہ خان کی اس جرات مندانہ گفتگو نے صارفین کے دلوں کو چھو لیا جس کے بعد سوشل میڈیا پر اُن کے حق میں تحسین و ستائش کا سلسلہ شروع ہوگیا، جو ان کی بےساختگی اور سچائی کا اعتراف کرتا ہے۔