بھارتی اداکار پریش راول کا مسلم اداکاروں کے خلاف بی جے پی کے موقف پر ردعمل سامنے آگیا۔

پریش راول بھارتی فلم انڈسٹری کے معروف اداکارہونے کے ساتھ ساتھ سیاست دان بھی ہیں، انہوں نے کہا ہے کہ انہیں مسلم اداکاروں کی جانب سے حکومتی جماعت بی جے پی کے خلاف کیے جانے والے بیانات پر کوئی اعتراض نہیں۔

ان کا کہنا تھا کہ وہ نصیرالدین شاہ، عامر خان اور شاہ رخ خان جیسے اداکاروں کی باتوں کو سننے کے لیے تیار ہیں کیونکہ انہیں یقین ہے کہ ان شخصیات کا کوئی خفیہ ایجنڈا نہیں۔

ایک انٹرویو کے دوران پریش راول نے کہا کہ وہ ان اداکاروں کی تنقید کا احترام کرتے ہیں اور اگر انہیں کچھ کہنا ہے تو وہ ان کی بات سنیں گے اور اس پر غور کریں گے۔

انہوں نے یہ بھی کہا کہ ان کی تیکھی باتوں سے ان پر کوئی منفی اثر نہیں پڑے گا اور وہ ان کی عزت کرتے ہیں کیونکہ وہ ان کے ساتھ محبت رکھتے ہیں۔

پریش راول نے نصیرالدین شاہ کو ہندی سینما کی ایک اہم شخصیت قرار دیتے ہوئے کہا کہ نصیرالدین شاہ جیسے افراد کے ساتھ ہونا ایک خوشی کی بات ہے کیونکہ ان کے ارد گرد خود کو محفوظ اور مطمئن محسوس کیا جاتا ہے۔

اسی دوران نصیرالدین شاہ کی اہلیہ رتنا پاٹھک شاہ نے بھی ایک انٹرویو میں اس بات کا ذکر کیا کہ ان کا اور پریش راول کا تعلق ہمیشہ ذاتی اور پیشہ ورانہ طور پر مضبوط رہا ہے، حالانکہ ان کے سیاسی نظریات مختلف ہیں۔ رتنا نے یہ بھی کہا کہ وہ کسی کو اپنے تعلقات میں سیاسی عقائد کو رکاوٹ نہیں بننے دیں گی۔

علاوہ ازیں عامر خان نے 2015 میں مذہبی عدم برداشت پر اپنے تحفظات کا اظہار کیا تھا، ان کو بھی انتہاپسندوں کی جانب سے دھمکیاں ملی تھیں جس کی وجہ سے انہوں نے اپنے بیٹے کی پرورش کے لیے ملک چھوڑنے پر غور کیا تھا۔