بلوچستان کے علاقے خضدار میں اسکول بس پر ہونے والے حملے پر پاکستانی شوبز شخصیات کا شدید ردعمل سامنے آگیا ہے۔

بلوچستان کے ضلع خضدار میں بچوں کی اسکول بس پر ہونے والے دہشت گرد حملے نے پورے ملک کو غمزدہ کر دیا ہے، اس المناک واقعے میں 3 معصوم بچے شہید جبکہ متعدد زخمی ہوئے، تاہم یہ حملہ بھارت سے منسلک دہشت گرد عناصر کی جانب سے کیا گیا۔

افسوسناک سانحے نے ہر پاکستانی کے دل کو دہلا دیا ہے اور ملک بھر میں رنج و الم کی لہر دوڑ گئی ہے، پاکستان کی شوبز انڈسٹری سے تعلق رکھنے والے کئی معروف شخصیات نے بھی اس واقعے پر شدید افسوس اور غم و غصے کا اظہار کیا ہے۔

اداکارہ درفشاں سلیم نے انسٹاگرام پر اپنے خیالات کا اظہار کرتے ہوئے کہا کہ بچوں کی اسکول بس پر حملے نے مجھے ہلا کر رکھ دیا ہے، یہ سوچنا بھی اذیت ناک ہے کہ کوئی معصوم بچوں کو نشانہ کیسے بنا سکتا ہے، ہم ان واقعات کو معمول نہیں بننے دے سکتے۔

دوسری جانب اداکار شہروز سبزواری نے بھی اسے بزدلانہ اقدام قرار دیتے ہوئے لکھا کہ بزدل دشمن نے ایک بار پھر معصوم جانوں کو نشانہ بنایا، ہم اس کی بھرپور مذمت کرتے ہیں۔

اداکارہ ماورا حسین نے بھی گہرے دکھ کا اظہار کرتے ہوئے کہا کہ ہر نئی خبر پہلے سے زیادہ تکلیف دہ ہے، بچوں پر حملہ صرف جرم نہیں بلکہ انسانیت کے خلاف سنگین ظلم ہے، انسانیت کہاں کھو گئی ہے؟

اس کے علاوہ دیگر فنکاروں، جیسے سمیع خان، کرن حق، عاصم محمود، فضا خاور اور ایمن خان نے بھی اس واقعے کی پرزور مذمت کی اور متاثرہ خاندانوں کے ساتھ ہمدردی کا اظہار بھی کیا۔

تمام فنکاروں کا متفقہ مطالبہ ہے کہ حملے میں ملوث عناصر کو فوری طور پر انصاف کے کٹہرے میں لایا جائے تاکہ مستقبل میں ایسے بزدلانہ اقدامات کی روک تھام ممکن ہو سکے۔