پاکستان شوبز انڈسٹری کی معروف اداکارہ علیزے شاہ نے پلاسٹک سرجری سے متعلق خبروں پر خاموشی توڑ دی ہے۔

پاکستانی اداکارہ علیزے شاہ، جو اپنی بےباک رائے اور انداز کی وجہ سے سوشل میڈیا پر اکثر تنقید کی زد میں رہتی ہیں، حال ہی میں خود پر لگنے والے کاسمیٹک سرجری کے الزام پر برہم ہوگئیں اور اس کی سختی سے تردید کی۔

یہ معاملہ اس وقت منظرعام پر آیا جب معروف سینئر اداکارہ صبا فیصل نے ایک نجی ٹی وی پروگرام میں شرکت کے دوران شوبز انڈسٹری کی مختلف اداکاراؤں کی تصاویر پر تبصرہ کیا۔

پروگرام کی میزبان نے صبا فیصل سے درخواست کی کہ وہ اداکاراؤں کو ان کی قدرتی خوبصورتی کی بنیاد پر نمبر دیں اور اسی دوران جب انہیں علیزے شاہ کی تصویر دکھائی گئی تو صبا فیصل نے انہیں صرف 20 فیصد نمبر دیے، جس پر سوشل میڈیا پر نئی بحث چھڑ گئی۔

اس ردعمل کے جواب میں علیزے شاہ نے انسٹاگرام پر ویڈیوز شیئر کرتے ہوئے کسی کا نام لیے بغیر اس تاثر کی سختی سے نفی کی اور اپنی انسٹااسٹوری میں کہا کہ اللہ کا واسطہ ہے، میں نے کوئی سرجری نہیں کروائی، بس وزن کم کیا ہے، کہاں سے لگتا ہے کہ میں نے سرجری کروائی ہے؟ پلیز مجھے بخش دیں، یہ سب بند کریں۔

انہوں نے وضاحت دیتے ہوئے کہا کہ جب میں نے ’عہدِ وفا‘ کیا تھا، اس وقت میری عمر صرف 17 سال تھی، میرے شناختی کارڈ نہ ہونے کی وجہ سے میری والدہ نے میرا پروجیکٹ سائن کیا تھا۔

اداکارہ کا کہنا تھا کہ لوگ توقع رکھتے ہیں کہ سالوں بعد بھی میں ویسی ہی نظر آؤں جیسی ابتدا میں تھیں لیکن اب میں 23 برس کی ہوچکی ہیں اور وقت کے ساتھ چہرے اور شخصیت میں فرق آنا فطری بات ہے۔

علیزے شاہ کے اس مؤقف کو ان کے مداحوں کی جانب سے خاصی حمایت بھی حاصل ہوئی جبکہ سوشل میڈیا پر سرجری سے متعلق تبصرے کرنے والوں کو بھی تنقید کا سامنا کرنا پڑا۔