پاکستان کے معروف یوٹیوبر رجب بٹ پر سوشل میڈیا صارفین کی جانب سے اپنی اہلیہ ایمان کے ساتھ ویڈیوز میں نامناسب رویہ اختیار کرنے اور انہیں نظر انداز کرنے کے الزامات لگائے گئے، جس پر انہوں نے بالآخر خاموشی توڑتے ہوئے وضاحتی بیان جاری کر دیا ہے۔

ان الزامات پر ردعمل دیتے ہوئے رجب بٹ نے کہا کہ میرے اور ایمان کے تعلق کو لے کر سوشل میڈیا پر ایک غلط فہمی پیدا ہو گئی ہے، ہماری ازدواجی زندگی پر لوگوں کی تشویش بجا ہے لیکن سوشل میڈیا پہلے ہی کئی رشتے خراب کرچکا ہے اور میں ایسا اپنے ساتھ نہیں ہونے دوں گا۔ ایمان ایک حساس لڑکی ہے، اُسے سوشل میڈیا کی دنیا کی پیچیدگیوں کا علم نہیں۔

رجب بٹ نے کہا کہ یہ سچ ہے کہ میں کیمرے کے سامنے ایمان کو زیادہ فوکس نہیں کرتا کیونکہ وہ میری بیوی حقیقی زندگی میں ہے، کیمرے پر نہیں۔ وہ ان دنوں بیمار ہے، اس لیے ویڈیوز میں شرکت نہیں کر رہی۔

انہوں نے مزید کہا کہ فی الحال ڈاکٹرز نے ایمان کو آرام کا مشورہ دیا ہے، اسی لیے وہ وی لاگز میں نظر نہیں آئیں گی۔ ہماری شادی کو پانچ ماہ ہو چکے ہیں اور میں اپنی تمام شوہرانہ ذمہ داریاں نبھا رہا ہوں، جو کچھ میرے پاس ہے، وہ میری ماں، بہن اور بیوی کا ہے۔

واضح رہے کہ رجب بٹ کی اس وضاحت کے بعد بھی سوشل میڈیا پر تنقید کا سلسلہ جاری رہا، ایک صارف نے لکھا کہ پیسہ سب کچھ نہیں ہوتا، عورت کو وقت اور توجہ بھی چاہیے ہوتی ہے جبکہ ایک اور صارف نے تبصرہ کیا کہ مرد یہ سمجھتے ہیں کہ صرف مالی ذمہ داریاں پوری کر دینا ہی کافی ہے۔

کچھ مداحوں نے کہا کہ شاید ایمان کو وی لاگز سے دانستہ طور پر دور رکھا جا رہا ہے جبکہ دوسرے صارف نے لکھا کہ ایمان ویڈیوز میں اس لیے نہیں آتیں کیونکہ وہ جذبات کو سچائی سے ظاہر کرتی ہیں۔

ایک اور صارف کا کہنا تھا کہ یہ الزامات نہیں بلکہ حقیقت ہے کہ رجب اپنی بیوی کو نظر انداز کرتے ہیں جبکہ چند مداحوں نے یہاں تک قیاس آرائیاں کیں کہ شاید ایمان حاملہ ہیں، جس کے باعث وہ سوشل میڈیا سے دور ہیں۔