حالیہ پاک بھارت کشیدگی اور اس کے نتیجے میں ہونے والی جھڑپوں کے بعد بھارتی میوزک اور فلمی پلیٹ فارمز پر پاکستانی فنکاروں کو نشانہ بنانا شروع کر دیا گیا ہے۔

متعدد معروف پاکستانی اداکاروں اور گلوکاروں کی تصاویر، پوسٹرز اور نام مختلف پلیٹ فارمز سے ہٹا دیے گئے ہیں، جس پر سوشل میڈیا صارفین کی جانب سے شدید ردعمل سامنے آ رہا ہے۔

فواد خان کو فلم کپور اینڈ سنز کے مشہور گانے بدھو سا من کے پوسٹر سے ہٹا دیا گیا ہے اور یہ گانا اب بھارت میں یوٹیوب پر دستیاب نہیں رہا، تاہم ان کی فلم خوبصورت کا پوسٹر تاحال تبدیل نہیں کیا گیا۔

اسی طرح، اداکارہ ماہرہ خان کو فلم رئیس کے البم کور سے ہٹا دیا گیا ہے، جہاں اب صرف شاہ رخ خان کی تصویر موجود ہے، تاہم فلم میں ماہرہ نے مرکزی کردار ادا کیا تھا۔

دوسری جانب اداکارہ ماورا حسین کو بھی نشانہ بنایا گیا ہے، جنہیں نہ صرف فلم صنم تیری قسم کے پوسٹرز سے ہٹایا گیا بلکہ اطلاعات کے مطابق انہیں صنم تیری قسم 2 کے کاسٹ میں شامل کرنے سے بھی انکار کر دیا گیا ہے۔

مزید برآں عالمی شہرت یافتہ پاکستانی گلوکار عاطف اسلم کا نام بھی ان کے گائے ہوئے گانوں سے ہٹا دیا گیا ہے، جو یوٹیوب، اسپاٹیفائی اور دیگر پلیٹ فارمز پر اب نامعلوم فنکار کے طور پر ظاہر ہو رہے ہیں۔

یہ اقدامات بھارت کی جانب سے کیے گئے آپریشن سندور کے بعد سامنے آئے ہیں، جو پہلگام واقعے کے ردعمل میں شروع کیا گیا تھا، تاہم پاکستان نے اس حملے کا بھرپور اور مؤثر جواب دے کر دشمن کو خاموش کر دیا، جس کے بعد سفارتی اور ثقافتی محاذ پر بھی تناؤ بڑھ گیا ہے۔

فنکاروں اور سوشل میڈیا صارفین نے ان اقدامات کو فن اور ثقافت میں سیاست کی مداخلت قرار دیتے ہوئے شدید تنقید کا نشانہ بنایا اور مطالبہ کیا ہکہ فنکاروں کو سیاسی تنازعات سے دور رکھا جائے۔