پاکستان شوبز انڈسٹری کی خوبصورت اور باصلاحیت اداکارہ سارہ خان اپنے نئے ڈرامے سے زیادہ اس وقت حالیہ انٹرویو کے ایک بیان کی وجہ سے سوشل میڈیا پر مرکزِ بحث بنی ہوئی ہیں۔

نجی ادارے کو دیے گئے ایک حالیہ انٹرویو میں سارہ خان نے خود کو فیمینسٹ کہلانے سے انکار کرتے ہوئے کہا کہ وہ خود کو “پرانے وقتوں کی عورت” سمجھتی ہیں۔

ان کے بقول مردوں کو وہ مقام دینا چاہیے جو فطری طور پر ان کے لیے مخصوص ہے، تاکہ خواتین پرسکون زندگی گزار سکیں۔

سارہ خان کا کہنا تھا کہ میں گھر میں رہنے والی عورت ہوں، مجھے بلوں کی لائنوں میں لگنا پسند نہیں، یہ کام مردوں کے لیے بہتر ہیں، مرد، مرد ہی رہیں اور عورتیں گھر میں۔

سارہ خان کے اس بیان نے انٹرنیٹ پر نئی بحث چھیڑ دی ہے، جہاں ایک طرف کئی صارفین ان پر روایتی صنفی کرداروں کو فروغ دینے پر تنقید کر رہے ہیں، وہیں کچھ لوگوں نے ان کے خیالات کی کھل کر حمایت کی ہے۔

ایک صارف نے لکھا کہ سارہ بالکل درست اقدار کی نمائندگی کر رہی ہیں، ہر کسی کو اپنی پسند کی زندگی جینے کا حق ہے جبکہ ایک اور نے تنقید کرتے ہوئے کہا کہ یہ سوچ خواتین کے خودمختار بننے کی راہ میں رکاوٹ ہے۔

واضح رہے کہ اس وقت سارہ خان ڈرامہ “شیر” میں اداکار دانش تیمور کے ساتھ پہلی بار اسکرین پر جلوہ گر ہونے جا رہی ہیں، جس کا مداحوں کو شدت سے انتظار ہے، تاہم ان کا حالیہ بیان ان کے ڈرامے سے کہیں زیادہ توجہ حاصل کر رہا ہے۔

سارہ خان کے مداح جہاں اُن کی سادگی، گھریلو مزاج اور شوہر فلک شبیر کے ساتھ محبت بھری کیمسٹری کو سراہتے ہیں، وہیں اب ان کے خیالات پر بھی کھل کر رائے دے رہے ہیں۔