پاکستان کے سینئر اور معتبر اداکار آصف رضا میر نے اپنے بیٹے احد رضا میر اور سابقہ بہو سجل علی کی علیحدگی پر لب کشائی کر دی ہے۔

اداکار آصف رضا میر نے پہلی بار اپنی سابقہ بہو سجل علی کے ساتھ پیشہ ورانہ تعاون اور سوشل میڈیا پر زیر گردش تبصروں کے حوالے سے کھل کر گفتگو کی۔

ایک حالیہ ٹی وی پروگرام میں شرکت کے دوران آصف رضا میر نے انکشاف کیا کہ وہ جلد ڈرامہ “میں منٹو نہیں ہوں” میں سجل علی کے والد کا کردار نبھاتے نظر آئیں گے۔

 اس کاسٹنگ پر سوشل میڈیا پر سوالات اٹھے، تاہم آصف رضا میر کا کہنا تھا کہ یہ فیصلہ ہم دونوں نے ایک پروفیشنل جذبے کے ساتھ کیا، رشتے بدل سکتے ہیں، لیکن احترام اور فن کی خدمت کو مقدم رکھنا چاہیے۔

انہوں نے مزید کہا کہ یہ ڈرامہ دونوں فنکاروں کے لیے ایک نیا موقع اور چیلنج ہے اور سجل علی نے بھی بہادری اور پروفیشنلزم کا مظاہرہ کیا۔

اس موقع پر آصف رضا میر نے اس وائرل ویڈیو پر بھی تبصرہ کیا جس میں احد رضا میر اور سجل علی کو ایک ہی تقریب میں دیکھا گیا۔

 ان کا کہنا تھا کہ ہماری فیملی ایسی باتوں کو دل پر نہیں لیتی، ہم جانتے ہیں کہ لوگ ماضی کے رشتوں پر تبصرے ضرور کرتے ہیں، مگر ہمیں معلوم ہے کہ وقار سے آگے کیسے بڑھنا ہے۔

اداکار نے زور دیا کہ رشتے وقت کے ساتھ بدلتے ہیں، اصل عقل مندی یہ ہے کہ پرانے زخموں کو نہ چھیڑا جائے بلکہ سیکھ کر آگے بڑھا جائے۔

واضح رہے کہ سجل علی اور احد رضا میر نے 2022 میں علیحدگی اختیار کی تھی، تاہم دونوں کی جانب سے اس حوالے سے کوئی باضابطہ اعلان نہیں کیا گیا تھا۔