پاکستان کی مشہور اداکارہ ماہرہ خان اور سپر اسٹار ہمایوں سعید کی رومانوی فلم ’لو گرو‘ کے گانے ’آ تینوں‘ نے سوشل میڈیا پر مقبولیت کے جھنڈے گاڑ دیے ہیں۔

شوبز انڈسٹری کی معروف جوڑی ہمایوں سعید اور ماہرہ خان ایک بار پھر بڑی اسکرین پر ایک ساتھ جلوہ گر ہونے جا رہے ہیں، ان کی نئی رومانوی کامیڈی فلم ’لو گرو‘ عید الاضحیٰ پر سینما گھروں کی زینت بنے گی۔

فلم کا اسکرپٹ معروف مصنف واسع چوہدری نے تحریر کیا ہے جبکہ مرکزی کرداروں میں ماہرہ اور ہمایوں کی پسندیدہ جوڑی شامل ہے، جو پہلے بھی کئی کامیاب پراجیکٹس میں ایک ساتھ نظر آ چکی ہے۔

حال ہی میں فلم کا پہلا پروموشنل گانا “آ تینوں” یوٹیوب پر ریلیز کیا گیا، جسے معروف گلوکار عارف لوہار نے اپنی دلکش آواز میں گایا ہے۔

گانے کی ویڈیو میں ماہرہ اور ہمایوں کی دل موہ لینے والی پرفارمنس نے شائقین کو خوب متاثر کیا اور سوشل میڈیا پر گانے کو زبردست پذیرائی حاصل ہوئی۔

مداحوں نے دونوں اسٹارز کی اسکرین کیمسٹری کو سراہتے ہوئے کہا کہ یہ جوڑی ایک بار پھر دل جیتنے آ رہی ہے جبکہ کچھ سوشل میڈیا صارفین نے تنقیدی تبصرے کرتے ہوئے فلم انڈسٹری میں نوجوان فنکاروں کو مواقع دینے کی ضرورت پر زور دیا۔

دوسری جانب فلم بینوں نے پاکستانی سنیما کو فروغ دینے کی ضرورت پر زور دیا اور کہا کہ ہمیں اپنے مقامی برانڈز اور کہانیوں کو آگے بڑھانا چاہیے تاکہ فلمی صنعت مزید ترقی کرے۔

واضح رہے کہ ماہرہ خان اور ہمایوں سعید کی نئی فلم ’لو گرو‘ سے شائقین کو بھرپور تفریح کی توقع ہے اور اس کی ریلیز کا انتظار بےچینی سے کیا جا رہا ہے۔